Hmasawn zel turin hawiher tihzau leh chet chhuah a ṭul - Governor

Nimin khan governor Gen VK Singh chuan Lianchhiari Run, Directorate of IPR-ah Mizo National Army (MNA) member hlui C Zama lehkhabu ziah 'The Escape' tih chu a tlangzarh a, hmasawn zel turin hawiher tihzau leh chet chhuah a ṭul thu a sawi.

Larsap chuan hmasawn zel turin hawiher tihzau leh mahni awm hmun aṭanga chet chhuah a ṭul thu sawiin, "Hmasawn turin mi dangte nen kan inpawhtawn a ṭul. Hmun dang aṭanga kan thil zir leh tawnhriat ṭha ber berte hi kan state tihhmasawn nan kan hmang ṭangkai thei a ni," a ti.

C Zâma'n a thil hriat leh tawnhriatte ṭha taka chhinchhiaha lehkhabu a siam chu fakawm a tih thu sawiin Governor chuan, "Ṭhangtharte hriat atana Mizo chanchina thil thleng pawimawhte ziaka dah zel a ṭul," a ti a, hun a kal zel anga Mizo chanchin ziahna lehkhabute an la hlut zual deuh deuh tur thu a sawi.

Hun eng emaw chen ram buaiin a chim hnuah Mizoram chu tunah chuan state ralmuang, hmasawn leh ziak leh chhiar thiam vekna kan nih tak thu sawiin Larsap chuan, "Midangte aiin tlai hret mah ila, remna leh muanna hrin chhuah hamaṭhatna hrang hrang kan nei a, hei hian hmasawnna rahbi thar a rawn thlen," a ti.

The Escape tih lehkhabuah hian Mizoramin zalenna a sual hun lai kum 1966-1986 inkara thil thleng leh tawnhriatte thai lan a ni . Phek 174 a chhah niin, bu khat hi Rs 200 man a ni.