MJA-te tan RTI Act zirhona buatsaih

Administrative Training Institute (ATI) chuan nimin khan Aizawl Press Club-ah Mizoram Journalists' Association (MJA) member-te tan Right to Information (RTI) Act, 2005 zirhona an buatsaih.

Zirhona kaihruaitu ATI director Rita Lalnunmawii Pachuau chuan, sorkar laipui aṭanga ti tura tih an nih angin hmun hrang hrangah RTI Act zirhona an buatsaih ṭhin thu a sawi a, "RTI Act hi kan hre bel tawh kan ti a ni maithei. Mahse, inhrilh nawn zel loh chuan a ṭangkai dan tur angin kan la hmang ṭangkai tâwk lo em aw a tih theih," a ti.

ATI Director chuan, sorkar hnathawk tan langtlang, rintlak leh mipui rawngbawl chu a pawimawh thu sawiin, "Sorkar hnaah thup tur a awm lo. RTI Act hi sorkar hnathawk tan harsatnaah ngaih tur a ni lo a, kan siamṭhatna tur zawk a ni," a ti a, sorkar hnathawkte'n RTI Act an zir nasa a, hma pawh an sawn thu a sawi.

MJA president Vanlalrema Vantawl pawhin thu sawiin, "Tun hma chuan SPIO-te'n awareness an nei ṭha lo a, tunah chuan an zia tawh. RTI Act awm hma chuan media-te tan information hmuh a har ṭhin a, tunah chuan thil kan chîk a, RTI hi a ṭangkai em em. RTI hmanga information kan hmuh kan chhuahte hi ram tan a ṭangkai a, mipuiin thil an hriat theih phah a ni," a ti.

Resource person Lily, Mizoram Information Commission (MIC) secretary chuan, RTI Act-in khua leh tuite a dah pawimawh thu a sawi a; tunah chuan technology a changkang tawh a, RTI hman a awlsam tawh tih sawiin, awm hmun aṭangin duh zawngte dil vek theih a nih tawh thu a sawi.

MIC Secretary chuan, RTI Act chu sorkar khalh ngilna atan te, sorkar kalphung hriatna atan leh sorkar inrelbawlnaa mipui an tel theihna a nih thu a sawi a, "Kum 2018 khan RTI Online version-1 siam a ni a, a siamṭhat ngai laite siamṭhain, tunah hian changtlung zawk leh ṭha zawkin online version-2 hman theih a ni tawh," a ti.

Zirhonaah hian MJA member-te'n rawtna an neihte an sawi bakah, zawhna eng emaw zat an zawt a; zawhnate chu MYC Secretary-in a chháng a ni.