Tlawng tui pump khawl awmna tihsànah hna thawh tur zinga 52% vel thawk zo tawh

Public Health Engineering (PHE) minister Prof. Lalnilawma chuan nimin khan Tlawng lui lianin Greater Aizawl Water Supply Scheme (GAWSS) Phase I-a tui pump khawl leh hmun pawimawh a chîm ṭhinte a chîm phak loh tura hmun tihsan hna thawh mek a tlawh a; hna thawh tur zinga 52% vel zawh a ni tawh.

Tlawng lui lianin GAWSS Phase-I tui pump khawl leh hmun pawimawh dangte a chîm pil ṭhin a, kum 2024-a Cyclone Remal vanga tuilian phei chuan Tlawng lei (bridge) thlengin a chîm. Tuilian vangin Tlawng lui tui pump-ah PHE department-in harsatna an tâwk ṭhin a ni.

Tuilianin tui pump khawl leh a kaihhnawihte a chîm tawh loh nan PHE department chuan June 1, 2026 aṭang khan Phase-I tui pump khawl leh hmun pawimawh dangte chu Tlawng lei (bridge) thar aia feet 2 vela sangah dah turin hmunhma an siamrem a, hna an thawk mek.

PHE Minister chuan, hna kal mek chu an beisei anga chaka thawh a nih thu leh hmasawnna hmuh tur a tam thu a sawi a, "Zawh hun tura kan target chu nakkum February a ni a, Pathian zara tun anga hma kan sawn zel chuan kumin December emaw, nakkum January-ah emaw chuan tui pump theia khawl kan run theih kan beisei. Hmunhma kan sakna iron rod leh cement-te PWD-in min endiksak vek a, hmanruaah hi chuan duhthusam kan ti," a ti.

Fûr ruahtui a hàn ṭan tih sawiin Prof. Lalnilawma chuan, "Tuiah kan harsa chho deuh a nih pawhin mipuite'n min lo hrethiam hrâm se kan duh. Tuna kan hnathawh hi kan zawh hunah chuan ngai kan awh chhoh mai bakah, a hma aiin tui kan hnianghnar thei deuh turah kan ngai," a ti a; tuilianin tui pump khawl a chîm ṭhin vanga harsatnate a awm tawh loh an beisei thu a sawi.

GAWSS Phase-I tlawhnaah hian PHE department hotu te, contractor-te leh thuthar thehdarhtute an tel a; tui pump chhuahna (VT jackwell), tui thlitfim sa pump chhuah tur dah khawlna (clear water sump) leh clear water pumphouse-a tui pump-na leh a kaihhnawih khawl chi hrang hrang dahna hmun tihsan hna thawh mekte an en a ni.