KHAWTHLIR

Thisen pe

Kohhran Thianghlim ṭhalai pawl, Youth Evangelical Front (YEF) Aizawl North Group chuan nimin khan Solomona Temple, Chawlhhmunah thisen pek rûnpui an huaihawt a, Civil Hospital, Aizawl tan thisen unit 203 an pe a, petute mipa 155 leh hmeichhia 48 an ni. PYD (NEI) Haulawng Bial pawhin Civil Hospital, Lunglei tan thisen unit 65 an pe a, petute mipa 56 leh hmeichhia pakua an ni.

CIC ruat thar

Mizoram sorkar chuan Mizoram State Information Commission-a chief information commissioner (CIC) atan H Lalengmawia, IAS (Rtd) a ruat. H Lalengmawia hian CIC kalchhuak John Neihlaia a thlak dawn a, pisa a luah aṭangin a hun (term) chhiar ṭan a ni ang. CIC thar ruatna hi nimin khan tihchhuah a ni.

Mental Health Day

Nimin kha World Mental Health Day a ni a; Aizawlah chuan IPR Lianchhiari Rûnah Kulikawn Hospital-a Psychiatry department, Rosewood Hospital leh National Mental Health Programme huaihawtin hman a ni. Mental Health Day hi Health additional secretary Lalnunmawii Ralte-in a hmanpui a, Day puala buatsaih poster a tlangzarh.

MTP din champha

Mara Thyutlia Py (MTP)-te chuan nimin khan MTP din champha an lawm. Siaha bawrhsap Saizikpuii chuan Thiahra khuaa MTP din champha lawmna a hmanpui a, Thiahra khuaa mi hmingthang pathum - kum 1914-a British sipai Chiatlo Chozah, unau huaisen Rôtha Siangy leh Thazaw Siangy, mi chak hmingthang Khaibi Vytuchho te lungphun a hawng.

Presbytery khawmpui

Mizoram Presbyterian Kohhran chuan October 8, Ningani zan aṭang khan presbytery inkhawmpui an hmang ṭan a, naktuk Pathianni zanah a ṭiak ang. Inkhawmpui hi Mizoram chhung leh páwna presbytery 47-ah neih a ni a, nimin khan rorel ṭan a ni a, naktuk chawhma inkhawmah kohhran upa tharte nemngheh an ni ang.