World Hospice & Palliative Care Day

National Programme for Palliative Care (NPPC), National Health Mission (NHM) leh Blessino Nursing School te chuan nimin khan Blessino Nursing School auditoriumah World Hospice & Palliative Care Day an hmang a; thupui chu 'Pain management: An essential part of palliative care' tih a ni.

NPPC state consultant Dr Lalthanmawii Khalthang sawi danin, sorkar kum kal mek 2026-27 ah April-August 2026 chhungin NPPC hnuaiah OPD-ah damlo 3,540 en a ni a, mi 723 admit niin, mi 94 chu phaiah leh Mizoram State Cancer Institute-ah thawn (refer) a ni. Damlo, an ina enkawl thar mi 1,833 an awm.

World Hospice & Palliative Care Day hmannaa khuallian Dr R Lalchhuanawma, NHM mission director chuan, palliative care chu, natna benvawn vanga thih hlauhawmte leh an chhungte’n nuam leh hahdam zawka hun an hman theih nana natna tawrh chhâwk zângkhai leh, a zual zel tur ven dan kawng zawn te, taksa natna bakah, rilru leh thlarau lama tawrhna awm theite enkawl a nih thu a sawi.

World Hospice & Palliative Care Day hi Mizoramah kum 2016 aṭangin kalpui a ni a, Health department-a district pakua - Aizawl East, Aizawl West, Champhai, Kolasib, Mamit, Lawngtlai, Lunglei, Serchhip leh Siaha-ah kalpui mek a ni. District thar Saitual, Khawzawl leh Hnahthial district-ahte pawh kalpui tum a ni bawk.

Dr Lalthanmawii Khalthang tarlan danin, NPPC hian Mizoramah chuan sum indaih lohna vangin cancer veite a huam ber. Damlote chu OPD leh damdawi-in ward-ah enkawl an nih bakah, damdawi-ina kal thei lote chu palliative care team (doctor & nurse)-te'n an inah kanin an enkawl ṭhin.

Damlote an inah an tlawh hian damloin a mamawh (home based care kit) - IV fluids, venflon, dressing hmanrua leh damdawi, catheter, ryles tube, sterile glove leh a dangte kensak ṭhin. Ei tur (food kit) - Sorazo, bawnghnute, artui, thei, hermin, lipofundin, leh a dangte a thlâwnin an pe ṭhin bawk.