ACON Lamp Lighting & Oath Taking

Aizawl College of Nursing (ACON) chuan nimin khan Dawrpui Multipurpose Hall-ah Lamp Lighting & Oath Taking Ceremony vawi hnihna an hmang a; zirlaite'n bati chhíin, nurse thutiam an chham.

ACON Managing Board chairman Dr KL Remsanga'n inlawmna thu a sawi a; khuallian Ebenezer Medical Center Board chairman Dr Lalhmingliana'n thu sawiin, nurse-te chu damdawi-in hmél lanna, damdawi-in ṭhat leh ṭhat loh hriltu an nih thu sawiin, "Zirlai an nih lai aṭang pawha ṭangkai thei an ni," a ti.

Inkhawmah hian Mizoram Nursing Council registrar Zochuanpuii kaihhruaiin ACON-a BSc (Nursing) zir tura lut ther zirlaite'n bati an chhí a, nurse thutiam an sawi rual. ACON principal Kapzawni'n ACON dinhmun tlangpui a sawi a; zirlai ti ṭhate hnenah chawimawina hlan a ni.

Aizawl College of Nursing hi private nursing college niin, BSc (Nursing) leh post basic BSc (Nursing) zirna a ni a, kum 2024 khan hawn a ni. Mizoram University hnuaia inziak lut a ni a, Mizoram Nursing Council leh Indian Nursing Council ten an pawmpui a ni bawk.