Kolasib-ah ESIC pisa thar hawng

Ministry of Labour & Employment hnuaia Employees State Insurance Corporation (ESIC) Northeast Branch Office, Kolasib chu nimin khan Assembly deputy speaker Lalfamkima, Kolasib bialtu MLA-in a hawng.

Lalfamkima chuan, Kolasib ESIC Branch pisa hawn a ni ta chu hmasawnna a nih thu a sawi a, "Social security scheme ṭha tak a ni a, mipui vantlangin a tam thei anga an chhawr ṭangkai ngei ka beisei. He insurance scheme hi thla tin tlemtê deposit-a hamṭhatna tam tak dawn theih a ni a, damdawi-ina inenkawlna te, zirna lamah mipui harsatna sukiangtu insurance pawimawh tak ni tura central sorkarin a duan a ni," a ti.

Kolasib-a ESIC pisa hawnna inkhawm hi ESIC Northeast Region deputy director Ahtehsan-in a kaihruai a; director Champak Biswas, insurance commissioner Anil Kumar Shatu, liaision officer David Lalfakzuala leh LESDE officer Helen Zochhingpuii te an tel. Kolasib bakah hian Aizawl, Champhai leh Lawngtlaiah ESIC pisa a awm mek a ni.