UPSC hmachhawn turte nen inkâwm

Mizoram Youth Commission (MYC) chairman Malsawmzuala Ralte chuan nimin khan Synod Conference Centre-a Synod Resource Centre a tlawh a, Union Public Service Commission (UPSC) buatsaih exam hmachhawn turte nen an inkâwm.

Malsawmzuala Ralte chuan, ruihhlo ngaite'n ruihhlo an nghei a, nun kawng dik an zawh theih nan sorkar, kohhran leh pawlte'n theihtawp an chhuah thu a sawi a, "Chutiang chiah chuan Mizo ṭhalaite UPSC exam-a an tlin theih nan kan vaiin theihtawp kan chhuah mek a, kaihhruaina ṭha, coaching class, zirlaibu, lehkha zirna hmun leh ṭul dang zawng zawng exam beih tumte hnenah chhawp a ni," a ti a; hlawhtling turin thawhrim a pawimawh ber thu a sawi.

Hnam dangte nena khaikhinin Mizo ṭhalaite'n theihna an nei sang tih kawng hrang hranga a lan thu sawiin MYC Chairman chuan, "Kum 12 lai IAS kan nei tawh lo hi chhu chat ngei tura theihna zawng zawnga bei turin zirlaite ka sáwm che u a ni," a ti.

MYC Chairman-in a tlawhnaah hian Synod Resource Centre hotute nen MYC leh SRC thawhho theihna apianga thawhho zel an rel a ni.