Bána Kaih hnuaiah mi 522 hnenah loan cheng nuai 4,879.10 pe tawh

Mizoram sorkar flagship programme, Bána Kaih (Handholding) kalpuitu department, district administration leh partner bank-te tan nimin khan Planning conference hall-ah Bána Kaih scheme zirhona buatsaih a ni. Mi 522 hnenah loan cheng nuai 4,879.10 leh Chief Minister's Special Package hnuaiah mi 7,275 hnenah ṭanpuina cheng nuai 3,351.03 pek a nih tawh thu tarlan a ni.

Zirhonaah hian Mizoram State Project Coordination Committee (MSPMC) member LP Lalchangkima leh Zohmingthanga ten kal khawmte chu thil pawimawh an hrilhfiah a; bank leh implementing department-te inher rem/siamṭhat ngaihna laite leh harsatna awmte sawiho a ni.

Workshop-a tarlan danin, Bána Kaih loan component hnuaiah ṭanpui tura thlan (progress partner) zinga mi 522 hnenah loan Rs 48,79,10,824 pek a ni tawh a; CM's Special Package aṭangin mi 7,275 hnenah ṭanpuina Rs 33,51,03,870 pek a ni tawh bawk.

Scheme hnuaia loan late chu sorkarin loan pung (interest) a rulhsak ṭhin a, loan interest cheng nuai 112.3 a rulh sak tawh bakah, guarantor fee cheng nuai 14 vel a pe tawh. Bána Kaih hnuaiah hian scheme 15 rìn luh a ni.

Zirhona hmanpuitu adviser to CM (Handholding) Dr KC Lalmalsawmzauva chuan, Bána Kaih chu chak zawka Mizoram a intodelhna theihna tur a nih thu a sawi a, "Implementing department-a nodal officer-te an pawimawh tak zet a, mi rintlak, Bána Kaih scheme hmanga eizawnna ngêlnghet nei tura thiamna leh theihna hman tlak neite chauh thlan an nih theih nan fimkhur leh uluk takin hma an lak a ngai," a ti.

Dr KC Lalmalsawmzauva chuan, mahni rama tharte ngaihhlut a ṭul thu sawiin "Mizorama thar hmunphiahte ram chhungah ngei ṭangkai taka hman uar zel a ṭul. Bana Kaih hi a hlawhtlin lehzual theih nan implementing department leh bank ten thawhhona ṭha an neih a pawimawh," a ti. Implementing department-a thawkte'n an department hnuaia progress partner-te vil ṭhate tan CM Special Award buatsaih a nih dawn thu a sawi bawk.