Manipal Hospital - Mukundapur-in thluak leh hnungzáng ruh zaiah an ṭhat thu an sawi

Manipal Hospital - Mukundapur, Kolkata hotute chuan nimin khan Aizawl Press Club-ah thuthar thehdarhtute an kâwm a; an damdawi-in chu hnungzáng ruh (spine) leh thluak (brain) zaiah India rama a ṭha ber pawl leh inenkawlna tlâwmna berte zinga mi a nih thu an sawi.

Press meet-ah hian Manipal Hospital - Mukundapur-a neurointervention & endovascular surgery director Dr Sukalyan Purkayastha leh Spine Surgery-a senior consultant Dr Anindya Basu ten thluak leh hnungzáng ruha natna leh harsatna awm ṭhin tlangpui te, enkawlna lama tunlai thiamna hmanga hma an sawn dante an sawi a ni.

Dr Sukalyan Purkayastha chuan, an damdawi-inah neurology lama harsatna neite hlawhtling taka enkawl an lo ni tawh tih a sawi a, "Stroke hi a hun takah enkawl a pawimawh," a ti.

Spinal disorder leh hnung nâ pung zel chungchangah Dr Anindya Basu chuan, hnungzáng ná leh spinal ṭha lo an tam tih sawiin, "Hnathawhna avanga taksa tih rimtawng lutuk te, thau lutuk leh chhan dang dang vangin taksaah harsatna a thleng thei," a ti a; hnungzáng ruh zaiah an damdawi-inah zai man tlawm zawka an tih ṭhin thu leh, khawl an neih ṭhat avangin an zai hlawhtlinna a san thu a sawi.

Manipal Hospital - Mukundapur-a doctor-te chuan, "Thluak lam leh spine natna eng pawh ṭha takin, man tlâwm zawkin kan khawih thei; kan khawl a ṭha a, damlo tan a him a, success rate a sang. Zai hawn zau ngai loin, tereuhtê chauh hawngin kan zai thei a ni," an ti a; India ramah cathlab nei ṭha berte zinga mi an nih thu an sawi bawk.