Bru chhungkua 190 hruai kîr tawh
Sorkar laipui thu anga Tripura relief camp-a Mizoram khua leh tui Bru awm mekte lak let hna thawh 9-na kalpui mek zelah chhungkaw 190 vel an rawn lêt tawh a, tun hnaiah erawh Mizorama lêt duh an awm rih lo. Hetih lai hian, Bru camp-a awm mekte chu Tripura sorkarin thla khat chhung a thlawnin ei tur (ration) a pe leh phawt dawn.
Bru hruai kir thawh 9-na hi October 3, 2019-ah ṭan a ni a, November thla tawp thleng kalpui tur a ni. Mamit district-ah chuan chhungkaw 134 an lêt tawh a, Kolasib district-ah chhungkaw 10 vel leh Lunglei district-ah chhungkaw 50 vel an lêt tawh bawk.
Mamit DC Dr Lalrozama'n Vanglaini palai zawhna chhánga a sawi danin, Mizorama let Bru chhungkuate chu an awmna tur district-ah hruai nghal zel an ni. An awmna tur district-a bawrhsapte'n chhawmdawlna hmasa an pe nghal a; an awmna tur khuaa in sakna tur Rs. 1,50,000 aṭangin first instalment Rs. 25,000 te, thla tin chhawmdawlna Rs. 5,000 leh thla khat daih ration buhfaite pek an ni.
Dr Lalrozama chuan, Bru lâk lêt hna chu sorkar thu ding lai angin kalpui zel a ni tih sawiin, "Ni tin camp-ah team-te an kal ṭhin a, aurinna hmangin an au ṭhin a. Rawn lêt duh an awm tawh rih lo a, han tih vak ngaihna a awm rih lo a, mahse, lak let hna chu kalpui zel a ni a, rawn lêt duh an awm phawt chuan hruai turin kan inring reng a ni," a ti.
Mamit Bawrhsap chuan, Mizorama rawn kîr Bru-te chu chhawmdawlna pek nghal zel an nih bakah, an hriselna dinhmun uluk taka enfiah zel a nih thu sawiin, "Rawn lêt zinga ṭhenkhat chu nau pai te, nauno pawm laite an ni a, chumi kawngah pawh chuan uluk taka enkawl an ni. Kan medical team-te an fakawm hle," a ti a; Bru rawn lêt an tam loh avangin an inbuatsaih anga an kal theih loh thu Vanglaini palai a hrilh.
Tarlan tawh angin, Bru pawl pathum - Mizoram Bru Displaced Peoples' Forum (MBDPF), Mizoram Bru Indigenous Democratic Movement (MBIDM) leh Bru Tribal Development Society (BTDS)-te chuan Bru lak lêt kal mek tihtawp leh October thla tìr aṭanga sorkar laipuiin a thlawna ei tur (ration) a pek ṭhin a tihtawp tâk pek chhunzawm phûtin October 31, 2019 aṭangin Kanchanpur-Ananda Bazar kawngpui chu Dasda-ah an dang a ni.
MBDPF, MBIDM leh BTDS-te'n ni nga chhung kawngpui an dan hnuah November 4 khan Tripura additional chief secretary Kumar Alok kaihhruaiin Tripura sorkar hotute nen Kanchanpur-ah an inbia a; Kanchanpur Sub-Divisional Magistrate-in November 4-ah vêk Cr.PC Section 144 hmangin punkhawm khapna thupek a chhuah avangin kawngpui dan chu November 5, Thawhlehni chawhnu dar 2:30 velah an titawp a ni.
Kawngpui dan tihtàwp hnuah Bru pawl hruaitute leh Tripura sorkar hotute chu an inbia a; Bru-te'n an duh ber pakhat chu ration pek chhunzawm a ni angin, Tripura sorkar chuan thla khat chhung atan a thlawna ration pek a remti a, chumi ang chuan tunah hian November thla chhung chu buhfai an pe dawn a ni. A hmaa Bru camp-a ration pek ṭhin, tihtàwp tâk erawh chu Tripura sorkar pek ni loin, sorkar laipui (Ministry of Home Affairs) pek a ni thung.
MBDPF, MBIDM leh BTDS-te'n November 5-a press release an lo chhuah tawhah chuan, sorkar laipuiin Tripura-a Bru refugee camp-a awmte ei leh in tur a pek (free ration) a tihtawp hnuah ei tur neih loh vangin mi panga an thih tawh thu leh damdawi-inah mi 50 dah an nih tawh thu an tarlang a ni.