Kuminah thla 6 chhungin rilru lama harsatna nei mi 6,091 ziak lut tawh

Sorkar kum kal mek 2026-27 ah September thla thleng khan rilru lama harsatna nei mi 6,091 chhinchhiah an ni. Rilru lama harsatna neite puitu atana din TeleMANAS chuan kumin 2026-ah September thlengin call 4,280 an dawng tawh.

October 10, Inrinni kha World Mental Health Day (rilru hriselna chungchang inzirtirna ni) a ni a, he ni pual hian October 9, 2026 khan National Mental Health Programme bultumin IPR Conference Hall-ah hun hman a ni.

National Mental Health Programme-a chhinchhiah danin, sorkar kum kal meka kum chanve (thla ruk) April - September, 2026 chhungin rilru lama harsatna nei chhinchhiah zat chu mi 6,091 an ni a; sorkar kum liam ta 2025-26 chhung khan mi 19,036 leh, a hma leh kum 2024-25 chhungin mi 21,910 chhinchhiah an ni.

Rilru lama harsatna neite'n harsatna an thlenna leh anmahni puihna atan TeleMANAS siam a ni a, toll free number 14416-ah biak theih reng a ni. TeleMANAS hian kumin 2026 September thla thlengin call 4,280 an dawng tawh a; Mizorama din a nih tirh aṭangin call 27,907 an dawng tawh.

NMHP state nodal officer Dr Robert L Khawlhring chuan, TeleMANAS chu trained counsellor leh mental health professional ten an ṭhutchilh reng a, rilru lama harsatna neite tan toll free no. 14416-ah engtik lai pawha biak theih a nih thu a sawi a; rilru lama harsatna leh dam lohna neite tan district tinah NMHP kalpui a nih thu leh, inentir duh tan civil/district hospital-ah OPD card lain inentir theih a nih thu a sawi bawk.