Traffic Police Zan Special Drive-ah mi 76 man

Aizawl Traffic Police chuan October 10, Inrinni zan khan zankhuain Aizawlah Zan Special Drive an kalpui leh a, lirthei dan bawhchhia 76 an man.

Zan Special Drive hi zan dar 9-ah ṭan niin, Aizawla hmun hrang hrangah traffic police-te'n lirthei tlante an endik a, nimin zing khawvar dawn thlengin lirthei an endik a ni.

Special Drive-ah hian lirthei dan bawhchhiat vangin mi 76 man an ni a, chu'ng zingah chuan driving license nei loa lirthei khalh tam berin, mi 24 an ni. Tlan phal loh zâwnga tlan (wrong side) mi 12, helmet khum loa two wheeler khalh mi paruk, rui chunga lirthei khalh mi pali, leh lirthei ri bengchheng khalh mi pahnih an man a; dan dang bawhchhiat vangin mi 28 an man bawk.

Aizawl Traffic Police chuan, Aizawl khawpui a him zawk theih nan Zan Special Drive an kalpui zel dawn thu an tarlang a, "Lirthei chetsualna leh dan bawhchhiatna titlem turin theihtawp kan chhuah zel dawn," an ti a; chhun leh zanah traffic dan leh hraite ngai pawimawha zawm turin lirthei khalhtute an chah.

Traffic police duty awm lohna hmuna dan bawhchhia te, mi dang tana harsatna thlen ṭhinte chu Traffic Control Room phone number 9366553559 leh 0389-2313061-ah hriattir ṭhin turin mipiu an ngen bawk.