Lengpui YMA-te'n lui an vêng ṭan

YMA, Lengpui Branch leh Lengpui Model Branch te chuan October 10, 2026 aṭanga luia sangha man a khap bawhzuiin October 10, Inrinni khan chuan Dialdâwk lui leh Lunghmul lui humhalh hnatlang an ṭan a, a khuhhawnna hun an hmang.

Mizoram sorkar chuan kumina sangha fuan hun laia sangha man a nih loh nan October 10 aṭanga November 30, 2026 chhungin Mizoramah lui sangha man khapna (closed season) a puang a; hei hian autonomous district council-te erawh a huam lo.

Sorkar thupek bawhzui hian Lengpui leh Lengpui Model branch YMA-te chuan Dialdâwk lui leh Lunghmul luiah sangha fuante man a nih loh nan an véng dawn a, YMA member-te hlawm hrang hrangah inṭhenin, nileng leh zankhuain lui dung an veng dawn a ni.

Lui pahnih ven hnatlang khuhhawnna hmanpuitu Aizawl district fisheries development officer C Lallianpuii chuan, sangha mantute'n eizawnna kumhlun an neih theih nan leh Mizoram mipute'n lui sangha ei tur an neih reng theih nan closed season puan a nih thu a sawi a, "Lui sanghate hi danin a phal hun leh a phal chin hmanrua chauh hmanga man ṭhin tur a ni a, luia sangha man turte'n phalna an neih ngei a ngai," a ti.

C Lallianpuii chuan, lui sangha man chung hanga dan zâwm lote chu The Mizoram Fisheries Act, 2002 hmangin pawisa chawitir leh lung-in tantir theih an nih thu a sawi a; lui humhalh tura YMA-te hmalakna leh thawhrimna chu thláwp tlat turin mipui a ngen bawk.

Sorkar thuchhuah chuan, Aizawl district-a YMA branch 27 dangte pawhin an huam chhunga luite humhalhin an veng ṭhin a ni.