FEMSE-in an duhte sorkar hotute hnenah an thlen

Federation of Mizoram Samagra Employees (FEMSE) hruaitute chuan November 8, 2019-a General Conference an neih ṭuma resolution an pawm chu nimin khan sorkar hotute hnenah an hlân.

FEMSE hian an resolution hi Legislative Assembly speaker Lalrinliana Sailo leh School Education secretary Esther Lalruatkimi hnenah an pe a; an thil duhte a hlawhtlin theih nan chak taka hmalak an tum thu an sawi. FEMSE chuan, SSA leh RMSA anga an awm laiin theih­tawp chhuahin an din­hmun a ngêlngheh theih nan association hrang hrangte'n hma an lo lak tawh thu an sawi a; sorkar laipui aṭanga SSA leh RMSA-te huang khata chhûnfin a, Samagra tih a nih tâk avangin association hrang hrangte chu huang khatah awmin, an zavaia hamṭhatna turin hma an la ta tih an sawi bawk.

FEMSE resolution hi chi hnih a ni a, pakhat chu hlawh chungchang a ni. An sawi danin, SSA leh RMSA hnuaia thawkte hlawh chu kum 2011 hnuah ennawn emaw, siamṭhat emaw a la awm lo a, thil man to zel dan chhûtin an hlawh a hniam ta viau niin an hria a, hlawh chungchangah hian hma an la ta a ni. Hlawh kalphung (pay structure) mumal tak neih an duh bawk a; resolution-ah chuan basic pay leh dearness allowance neih an duh thu an tarlang.

FEMSE resolution point pakhat zawk chu, School Education department hnuaia hna lak turah Samagra hnuaia thawkte corresponding post (an thawh mek ang hna ruak) awmah 70% chu thawk tawh sa leh sorkar tana an ṭhat lai hun lo hmang ral tawh Samagra hnuaia thawkte tana zuah (reserve) tura ngenna a ni. Hun rei tak chhung sorkar tana an thawh tawhna te, ṭhat lai hun zawng zawng an lo hman tawhnate zahsak a, an tana special scheme ṭha tak siam tur leh seniority-a regularize (sorkara dah nghet) turin an ngen a ni.

An resolution-te hi FEMSE hruaitute chuan chak taka bawhzui zel an tum a, an thu thlente chu bawhzuisak ngei turin sorkar hotute an ngen. Resolution chungchangah November 20, 2019 thlenga thu lawmawm emaw, hmalakna duhawm an hriat loh chuan na lehzuala hmalak an tum bawk. FEMSE hi August 16, 2019 khan din a ni a, SSA leh RMSA a nih laia association paruk - MIREWA, MSSTA, MISIA, SPRAM, MISEA, SEAM-te an inchhûngkhawm a; member mi 5,000 vel an awm mek a ni.