Thla 10 chhungin New Market-ah Pawisa tihbo Rs. 9,60,655 a tling

Kumin January aṭanga October thla thleng khan Aizawl New Market huam chhungah pawisa tihbo Rs. 9,60,655 report a awm a, chu'ng zingah chuan Rs. 6,000 chauh hmuh lêt a ni.

New Market Office hotute'n Vanglaini palai an hrilh danin, January-October 2019 chhungin New Market Office chuan pawisa tihbo report an dawn belhkhawm Rs. 9,60,655 zinga Rs. 6,000 chiah hmuh lêt a, a tibotu hnena pek lêt a nih laiin, Rs. 9,54,655 chu a bo hlen a ni.

Pawisa chhar report belhkhawm chu Rs. 40,961 a awm ve thung a, chu'ng zinga Rs. 19,908 chu a nei­tute hnenah pêk let niin, a chhartu hnena pek tâk Rs. 14,499 a awm a, tuna la pek chhuah loh (an la kawl mek) Rs. 6,554 a awm bawk.

New Market Office report-a a lan danin kum­­in January-October chhung khan ATM card, Aadhaar card, voter ID, driving licence, passport, mobile phone, PAN card, smart card, golden card, rangkachak ṭhi, sana, chahbi leh patla tihbo report 103 a awm a; chu'ng zingah chuan 53 chiah hmuh lêt a ni.

Thil bo report zinga mi ni lo, a chhartute'n New Market Office-a an thehluh ATM card, voter ID, Aa­dhaar card, PAN card, driving license, passport, mobile phone, pendrive, tarmit leh golden card 24 a awm a; chu'ng zinga 21 chu a neitute hnenah pek lêt niin, la pek let loh pathum a awm bawk.