Rubber & Allied Crops Development Board tan cheng vbc. 2,043.37 ruahman

Rubber and Allied Crops Development Board chu nimin khan an chairman R Lalzirliana, Land Resources, Soil & Water Conservation minister hoin a pisaah an ṭhukhawm. Board hmalakna tura ruahmanna siama sum hman ngai tur belhkhawm chu vbc. 2,043.37 a ni.

R Lalzirliana chuan, department-te'n Board member secretary Valbuanga hoa rang taka hmalakna tur ruahmanna ṭha tak an siam chu lawmawm a tih thu leh, SEDP hnuaia Board zingah hmalakna tur ruahmanna pharh thei hmasa pawl an nia a hriat thu a sawi.

Board vice chairman Lalrinsanga Ralte, MLA pawhin thu sawiin, thil thar chhuah reng rengah, a hralhna a pawimawh ber tih a sawi a, "A hralh chhuahna lamah market linkage kan siam a pawimawh dawn a, chutiang hawi zawnga a tìr aṭanga ruahmannain a huam tel a ṭha a ni," a ti.

Rubber & Allied Crops Development Board Member Secretary sawi danin, ṭhelrêt bika hmalakna tur chu kum 10 atan duan a ni a, a kum khatnaah Kolasib, Mamit leh Lunglei district-a a ṭhat duhna hmunahte kalpui tum a ni.

Rubber and Allied Crops 

Development Board ruahmanna

•    Ṭhelrêt behchhana loneitute leh thingtlang lama awmte tan eizawnna siamsak thei tur project cheng vbc. 1659.34.

•    Mizorama coffee chînna hmunhmate tihzauhna tur leh natnain coffee kûng a tihchhiatte thlak a, a thar chìnna tur project cheng vbc. 85.87.

•    Hmunphiah chìn belhna tur project cheng vbc. 107.47.

•    Kuhva chìnna hmun zauh leh a sâwng­bawlna tur project cheng vbc. 81.64.

•    Ruahtui vanga ram chhe thei tur vênna ni paha loneitute ṭangkaipui thei tur project cheng vbc. 109.05.

•    Project panga belhkhawm cheng vbc. 2,043.37