KHAWTHLIR

Phulpui khua chuan nizan aṭang khan haw rûnpui leh an khaw middle school kum 40-na, ruby jubilee lawmna hun an hmang ṭan. Nizana inkhawm chu School Education minister Lalchhandama Ralte-in a hmanpui a, Phulpui Middle School aṭanga chhuak graduate-te hnenah chawimawina leh lawmpuina hlan a ni. Jubilee lawmna leh haw rûnpui hun hi vawiinah hman chhunzawm a ni dawn a, bialtu MLA Prof. Lalnunmawia khuallian a ni ang.

Rural Development minister Lalruatkima chuan nimin khan East Lungdar BDO (Block Development Officer) pisa a tlawh a, khawtlang hruaitute leh BDO pisaa thawkte nen an inkâwm. Minister chuan, "Mipui nen thawhhona ṭha neiin ram kal i siam ang u. Hna reng reng a ṭhain a tlo tur a ni, tih hi hna thawktu leh a viltute'n kan vawng reng tur a ni," a ti a; faina kawngah nasa lehzuala ṭan lak a ṭul thu a sawi bawk.

Remlalfaka (4) s/o Ngur­thantluanga, Tualte khua­ chu November 10, Pa­thianni tlai dar 5 vel khan an ṭhenawm naupang kum 10 miin silai (ulhbun)-in a kâp hlum palh nia thu dawn a ni. Remlalfaka nu pawh a ­hliam a, Champhai District Hospital-ah hruai a nih thu Tualte Branch YMA hruaitute chuan an sawi.

Lalhmingmawii Rawihte d/o Sangṭhuama (Hriat­na Monthly Magazine) lehkhabu ziah, 'Naupang fel kan ni' tih chu nimin khan Aizawl Press Club-ah Mizoram Legislative Assembly speaker Lalrinliana Sailo-in a tlangzarh.

Nimin khan Ai­zawla a vawi khatna atan National Hydrology Project hnuaiah 'GIS and remote sensing with special emphasis on hydrological modelling’ tih thupui zirhona buatsaih a ni a, Irrigation & Water Resources (IWR) department secretary Valbuanga'n a hawng. Training hi India hmarchhak state-te tana buatsaih a ni a, November 15, 2019 thleng a awh dawn. National Institute of Hydrology, Roorkee aṭangin scien­tist pali - Dr Sanjay K Jain, Dr LK Lohani, Dr Vishal Singh leh Dr Pankaj Mani ten thil pawimawhte an zirtir ṭhin dawn a ni.