Tuiriala incinerator chungchangah CESJ-in Lokayukta-ah FIR an thehlut

Centre for Environment & Social Justice (CESJ) chuan Solid Waste Managment Centre (SWMC), Tuiriala bawlhhlawh hâl (incinerator) bunah thil dik lo awm niin an hria a, nimin khan Lokayukta-ah first information report (FIR) an thehlut.

CESJ-in FIR-a an tarlan danin, SWMC-a bawlhhlawh hâlna (incinerator) bunah thil dik lo a awm ngeia a lan avangin thil dik lo titute chungah action lak a nih theih nan hma la turin Lokayukta an ngen a, "SWMC a tâwt em em a, Aizawl mipui nuai 3-4 bawlhhlawh a leng lo. Hetiang a nih laia SWMC-in a mamawh bawlhhlawlh hâl ralna August 7, 2022 daih tawha supply order pek tawh, vawiin thlenga hman ṭangkai a la ni lo hi thil dik lo lian tak a awm tih a chiang a, Lokayukta-in hma a lak a ngai a ni," an ti.

Mizoram chu bawlhhawlh sawngbawl ṭhat loh vangin a hmingchhe hle tawh nia tarlangin CESJ chuan, "National Green Tribunal (NGT)-in December 8, 2022 khan bawlhhlawlh sawngbawl ṭhat lohin environment a tihchhiat compensate nan cheng vbc 50 a chawitir," an ti a; kum 2024 leh 2025-ah pawh Mizoram sorkarin bawlhhlawh a la sawngbawl ṭhat chuan loh avangin NGT hian a rawn hrem nawn leh niin an sawi.

CESJ FIR hi an assistant secretary Jonathan Lalnunpuia'n Lokayukta chairperson Lalmalsawma hnenah a thehlut a; SWMC-a bawlhhlawh hâlna bun kaihhnawihah thil dik lo a awm ngei nia an hriat avangin chhui chiang turin Lokayukta an ngen a ni.