UDPA department hnathawhte thlir let

Urban Development and Poverty Alleviation (UDPA) department chuan nimin khan an minister K Sapdanga hoin UDPA Auditorium-ah department hnathawhte thlirletna leh sawihona hun, review meeting an hmang. Minister chuan, department dangte nen thawhhona ṭha tak neih a pawimawh thu a sawi.

Review meeting hi UDPA secretary V Lalsangliana’n a kaihruai a; UDPA minister K Sapdanga chuan, "Department dangte nen thawhhona ṭha tak kan neih a pawimawh a, department chhunga thawktute pawh thawhhona ṭha leh inlungrualna ṭha tak nena hna kan thawh a pawimawh," a ti.

K Sapdanga chuan, UDPA department hotute chu an mawhphurhnate ṭha taka kengkawh zel turin a fuih a, "Thawktu awm zat ngaihtuaha hna ngah ber department zinga mi kan nih avangin department dangte aiin kan thawhrim a ngai a, kan working hour pawh mi dang aia a tam a ngai a ni," a ti. UDPA department hnuaia hnate ṭha taka thawh a nih theih nan hnathawhte vil ṭha a, contractor-te pawh uluk taka vil zel turin officer-te a chah a; ṭhahnemngai tak leh theihtawp chhuah zel turin duhsakna a hlan.

Ṭhutkhawmah hian UDPA department hnuaia project leh scheme-te thlirho a ni a; department hnuaia pisa hrang hrang - Directorate, Town & Country Planning, Mizoram Urban Development Agency Limited (MUDAL), Aizawl Municipal Corporation (AMC) leh Lunglei Municipal Council (LMC) aiawhte'n an enkawl ṭheuh project-te an sawifiah. Harsatna eng emaw vanga project kal tluang tawk lote chak zawka kalpui dan tur sawiho a ni bawk.