CMC, Vellore-in MUHCS an zawm

Christian Medical College (CMC), Vellore chuan nimin aṭang khan Mizoram Universal Healthcare Scheme (MUHCS) an zawm a, Health minister Lalrinpuii hoin inremna thuthlung (MoU) an ziak.

Sorkar thuchhuah tarlan danin, MUHCS 1.0 aṭang khan CMC, Vellore hi MUHCS zawm turin vawi eng emaw zat dawr a ni a, cashless-in an kal thei lo a, re-imbursement system lo chuan an kal theih loh thu dawn a ni ṭhin. Health Minister-in a bawhzui zel a, MUHCS chu rintlak leh innghahna tlak, state pawna private hospital dangte pawhin harsatna an neih loh thute a sawipui a ni.

Health Minister hian CMC, Vellore hotute hnenah, mipui tana theihtawpin MUHCS a kalpui avang leh bill pek chhuahah harsatna a awm loh thu te a hrilhfiah hnuah inbiakna chhunzawm a ni a; damlo, a bikin natna khirh leh damdawi-in lian mamawhte tana ṭangkai taka cashless-a an inenkawl theihna turin CMC, Vellore chuan inremna ziah an remti ta a ni.

CMC, Vellore hotute chuan MUHCS chu ṭha an tih thu sawiin, "Sorkar hnathawk mai ni lo, mi rethei berte thleng phak healthcare scheme a nih avangin theihtawp chhuaha thawhho kan duh. Mizoram sorkarin tih tak zeta min dawr hi a lawmawm. Draft MoU pawh darkar 48 chhungin kan pawm a, MoU kan buaipui tawha kan pawm ran ber a ni," an ti.

Health Minister chuan, damdawi-in hrang hrang zingah an rate a tlàwm fál an tih thu sawiin, "Damlo enkawlna rate hrang hrang pawh hospital dang ngaihtuaha man tlawm taka kalpui theih a ni tur hi Mizoram mipui tan a ṭangkai hle dawn a ni," a ti a, Mizoram sorkar tan a lawmawm thu a sawi.

Inremna thuthlungah Mizoram sorkar aiawhin Health secretary Lalzarmawii, under secretary H Lalhruaitluanga leh MSHCS programme manager Dr Lalbeiseia Renthlei ten hming an ziak a; CMC, Vellore aiawhin director Dr Biju George, medical superintendent Dr Rajesh I leh associate director Dr Selvamani B ten hming an ziak a ni.