Sangha khawitu mi 16,223 an awm mek

Fisheries department chuan Aizawl district-a sangha khawitute tan nimin khan training an buatsaih a, Fisheries minister K Lalrinliana'n a hmanpui. Mizoramah sangha khawia eizawng mi 16,223 an awm mek tih tarlan a ni.

Minister K Lalrinliana chuan, sanghaa Mizorama intodelh theih nan tih tak zeta ṭan lâk a ṭul thu sawiin, "India ram pum thlirin, ram hectare khata zau dîlah kum tin chawh­rualin sangha quintal 30 thar theih a nih laiin, Mizoramah chuan hectare khatah quintal 12 vel thar ṭhin ang kan ni," a ti a; mi dangin an tih theih chu ti ve thei tura inngaihtuah thar turin sangha khawitute a chah.

Fisheries Minister chuan, sorkarin ṭanpuina tur scheme hrang hrang hmanga sum a pekte leh training a buatsaihte chu hmang ṭangkai turin a fuih a, "State dang aṭanga sangha lâk luhte luahlâna Mizoram mipuite khamkhawp sangha kan thar chhuak thei a ni," a ti. Minister hian sangha khawitu mi panga hnenah Welfare of Fishermen scheme hnuaia in sak ṭanpuina second instalment a hlân nghal.

Training hi Fisheries director F Vanlal­lawma’n a kaihruai a, Fisheries secretary Thlamuana leh director hlui C Laldawng­liana te pawhin thu an sawi. 'Pond ma­nagement & common carp breeding' tih thupui hmangin Fisheries extension officer Zomuansangi’n sangha khawitute a zirtir a, sawihona leh zawhna leh chhanna hun hman a ni bawk.

Training-a tarlan danin, tun dinhmunah Mizoramah sangha khawia eizawng mi 16,223 an awm a, sangha khawina tuikhuah zawng zawng belhkhawm chu hectare 5,477 a ni. Aizawl district bikah sangha khawitu mi 2,063 an awm a, chu'ng mite sangha khawina tuikhuah zau zawng belhkhawm chu hectare 480 a ni.