KHAWTHLIR

RTI Week hmang

Nimin khan Champhai leh Khawzawlah RTI Week pualin sorkar hotu te, tlawmngai pawlte leh khawtlang hruaitute tan RTI Act 2025 chungchang zirhona buatsaih a ni a, district bawrhsap ve vete'n an hmanpui. RTI Act chu information ṭangkai dil chhuah nan leh sorkar dik leh langtlang a awm theih nan hmang turin bawrhsapte chuan kal khawmte an sawm a; sorkar hotute pawh dik leh langtlang taka hna thawk zel turin an chah a ni.

Naupang huaisen lawmpuina hlan

Khawzawl bawrhsap K Vanlalṭhiana chuan nimin khan a pisaah Jeevan Raksha Padak Award 2025 dawngtu C Laldinkimi, Kawlkulh lawmpuina hun a buatsaih a; Khawzawl Sub-Headquarters YMA leh Kawlkulh Group YMA hruaitu te, DC pisaa thawkte an tel. Bawrhsap chuan, India ram puma award dawng thei mi 30 vel zinga Khawzawl district mi an tel chu lawmawm a tih thu sawiin, award a dawn theihna tura thâ leh zung leh ngaihtuahna sengtu YMA hruaitute chungah a lawm thu a sawi.

Project Thaichhawninu

WCD Lawngtlai District Programme Office bultumin nimin khan Lawngtlai Areopagy-ah 'International Day of the Girl Child' leh 'Project Thaichhawninu Free SSY Account Opening Drive Programme' hman a ni a; DRDO project director H Zonunmawia'n a hmanpui. Free SSY Account hi hmeichhe naupang kum 10 hnuai lam tan hawn theih a ni a, kum khatah a tlem berah Rs 250 leh a tam berah Rs 1,50,000 dah luh theih niin, kum 21 hnuah lak chhuah theih a ni.

Bawrhsapin lawmpuina hlan

Japan-a zawh tak Asian Games 2026-a hockey-a gold medalist Lalthantluangi Fanai, Kanghmun South chu nimin khan Serchhip bawrhsap Paul L Khuma'n a pisaah lawmpuina a hlan. Bawrhsap chuan, Lalthantluangi chu hockey tihmingṭhatu mai ni lo, Mizo ṭhalaite tana beiseina siamtu a nih thu sawiin, a kal zelna turah duhsakna a hlan. Lalthantluangi hi Serchhip District Hockey Association hruaitute'n an ṭawiawm a ni.