Lunglei dist-ah rualbanlo 1,414 chhinchiah

Lunglei additional DC Zoramdini hoin nimin khan a pisaah Lunglei district-a vohbik (Persons with Disabilities - PwD)-te chawikanna tura hmalakna 'Project LEAP' (Lunglei's Empowerment for Access and Equity for all Persons) hnuaia vohbikte hriselna dinhmun endikna buatsaih dan tur leh hmachhawpte sawiho a ni. Project LEAP kaltlangin Lunglei district-ah PwD 1,414 chhinchiah an ni tawh.

Ṭhutkhawmah hian Project LEAP hnuaia hmalak tawhnate leh bial hrang hranga vohbikte hriselna dinhmun endikna (health assessment camp) buatsaih tawh dante thlirho a ni. Lunglei district-a PwD-te dinhmun zirchianna kalpui tawhna aṭangin rualbanlo mi 1,414 chhinchhiah tawh an ni a, chung zinga 867-te chu an hriselna dinhmun endik tawh a ni tih an tarlang.

Tarlan danin, rualbanlo hriselna endik tawh mi 867 zinga 437 chu Unique Disability Identity (UDID) siamsak an ni a; siam hmabak 430-te chu Aadhaar leh phone number thlun zawm fuh loh vang leh inbiak pawh harsat vanga la siamsak loh an ni.

ALIMCO nen ṭang dunin PwD leh upa mi 1,452 hnenah cheng nuai 114 chuang hu hmanrua chi hrang hrang 7,263 sem a ni tawh a; hmanrua pek leh turah kumin October leh November thla chhungin pek turte endik a ni dawn.

Nimina ṭhutkhawmah hian Lunglei Municipal Council (LMC) huam chhungah PwD chhinchhiah sa UDID la nei lo mi 159 an awm a; October chawlhkar hnuhnung berah Civil Hospital, Lungleiah assessment camp buatsaih an rel.

LMC pawn lamah chuan BDO-te'n Social Welfare office nen inráwnin vohbik la endik lohte lo chhinchhiah se, a remchan danin November 2026 chhungin RD block chhung hmun hrang hrangah assessment camp buatsaih ni se, an ti.

Lungleia Social Welfare office-in naupang a bika enkawl ngai (Children with Special Needs - CwSN)-te enkawl dan tur standard operating procedure (SOP) an ruahman milin District Education Office leh BDO ten zirlaite zinga CwSN-te zirchianna kalpui se, an ti. Vohbikte leh enkawl bik ngai naupangte'n an pawlpuite nen inang tlânga zirtirna an dawn theih nan zirtirtute'n an zirlaite dinhmun hre chiang tura an chîk peih a ṭul thu leh hriatna/hmuhna chak lo zawkte mamawh mila enkawl leh zirtir an thiam a ṭul thute sawi a ni.