Sorkar hnathawk kut phuar phelh a ngai - ZPM General Secretary

Nimina ZPM party chhung inkhawmah an general secretary Phai­rothanga'n thu sawiin, sorkar hnathawkte kut phuar phelh a, ram hruai danah kalphung thlak a ngaih thu a sawi.

ZPM General Secretary chuan, "Kan sorkar hnarkaitu minister-te leh contractor-te sam inphiar zawm leh hnung thak inhiah tawn avangin sorkar hnathawkte kut phuar an ni a, sorkar hnathawk kut phuar phelh a ngai a, kalphung thlak a ngai a ni," a ti.

Mizoram hmun hrang hranga kawngpui pawimawhte a tlo lo ṭhin hle tih sawiin Phairothanga chuan, "PMGSY kawng tam tak kum khat pawh daih lo kan nei ṭhin hi a veiawm em em. State danga an hman ve tho, IIT-Kharagpur approved technology kan hmang a, SOR-te kan hmang diklo nge, kan engineer-te an thiam lo bik em ni ang? Ni lo e, kan engineer-te hi mithiam tak takte an ni a, nungchang ṭha leh Pathian ṭih tak takte an ni," a ti a; engineer-te chu ram leh hnam leh khawtlang veinaah pawh mi tam tak tluk loh an nih thu a sawi.

Phairothanga chuan, PWD-in Zuangtuiah Quality Control Division a nei a, Lungleiah sub-division an nei bawk a, chu'ngah chuan laboratory ṭha a awm tih sawiin, "Contractor-te'n lung, cement leh thil dang an hman turte an endiktir 

ṭhin. Mahse, chu'ng hmanraw certified-te chu an hmang tak tak em, an thawk ṭha em tih entu Project Implementation Unit (PIU) lam kut phuar a ni leh ṭhin si," a ti.

Kawng siam zawh a nihin hna a la zo lo tih sawiin ZPM General Secretary chuan, "Hnathawh chu an vil zui tur a nih laiin, a endiktu tur sorkar hnathawkte kut phuar a nih ṭhin avangin defect lia­bility period-ah contractor-te chu kan officer-te'n an ko thei lo a, a tawpah mipuiin kan tuar ta ṭhin a ni," a ti bawk.