Bru lâk lêt an tlem vangin an chen lailawkna tura sak an luah khat lo

Tripura-a Bru refugee camp-a awm Mizoram khua leh tui Bru-te hruai kîr zinga Lunglei district-a awm turte chu October thla chhunga hruai kîr zawh tuma ruahmanna siam a ni a; Bru lâk lêt hna thawh hun chhung pawhsei a nih avang leh beisei anga kîr an tam loh avangin an chen lailâwk­na tur sakte an luah zo lo a, ṭhiah loin a la ding zel.

Tlabung Sub-Division chhung Dinthar khuaa dah tur Bru lak lêt buaipui­tu Administrative Officer T Lalmuanthanga sawi danin, tun ṭum Bru lak lêt thawh 9-naa Tripura aṭanga hruai kîr, an awmna tur hmuna inbéngbel tawh zingah Tripura refugee camp-a lêt leh an awm lo a; Bru rawn kîr zinga a tam zawk chuan an chenna tur in an sa mek a ni.

Dinthar khuaa dah tur Bru-te'n an chenna in pangngai an sak hmaa an awm lailâwkna tur sorkarin a siam, Tlabung Licheng khelmuala sak chu ṭhiah loin a la ding reng a, luahtu pawh an awm meuh lo. Licheng chu Tlabunga khelmual puitling awmchhun a ni a, Bru-te awm lailâwk­na hmun atan hman a nih avangin, December thla tira Mizoram State Games inbuatsaihna atan an hmang thei rih lo a ni.