Mizorama bank-te CD ratio target atan 67% bituk a ni - DoNER Minister

Nimin khan Mizoram University auditorium-ah hmarchhak state tihhmasawnna tura bank-te leh sorkar hotute inràwnkhawmna, 'North East Bankers' Conclave 3.0' buatsaih a ni a, Development of North Eaterns Region (DoNER) minister Jyotiraditya M Scindia-a'n a hawng. Minister chuan, bank-te credit deposit (CD) ratio tihsànna tur target siam a nih thu leh Mizorama bank-te tan 67% bituk a nih thu a sawi.

Jyotiraditya M Scindia chuan, Conclave buatsaih turin uluk takin North Eastern Development Finance Corporation Ltd (NEDFi) leh Department of Financial Services te nen zirchianna neiin ruahmanna siam a nih thu a sawi a, "DoNER Secretary-in a mal tê têin state tin aiawhte kâwmin, target bituk a ni. Bank-te CD ratio tihsànna tur target siam a ni a, Tripura tan 47% aṭangin 60%-ah, Arunachal tan 60% leh Mizoram tan 67% a ni. CD ratio tihsàn hi state chhunga sum lêngvâk tihpunna leh state tihhmasawnna hmanraw pawimawh a ni," a ti.

Hmarchhak state-te chu ṭhalai hna thawk thei rual tamna, lehkha thiam, ziak leh chhiar thiam tamna, ram leilung hausakna tam tak awmna a nih thu sawiin Scindia chuan, "Hmarchhak state tihhmasawn nan bank leh sorkar thawhhona a pawimawh. NE Bankers’ Conclave 2.0 hmachhawp bawhzuinaah December 2024 leh March 2026 inkar khan bank branch thar 131 leh ATM booth 126 hawn belh a ni," a ti. Bank leh Postal service thlun zawm tura khaw 9,479 chhinchhiah aṭangin khaw 6,905 thlun zawm a nih tawh thu sawiin, la thlun zawm loh khaw 2,574 la awmte chu thlun zawm thuai a nih theih nan nasa zawka ṭan lak a ṭul thu a sawi.

DoNER Minister chuan, mi 3,000 chenna khuaah chauh brick and mortar branch din tura inkaihhruaina awm chu mi tam zawkin ṭangkai taka banking an chhawr theih nan hmarchhak state tan mi 2,000 chin chenna khuaah tihhniam a nih thu a sawi a, "Hmarchhak state-a non-branch transaction zinga 90.2% chu Unified Payments Interface (UPI) kaltlang a ni," a ti.

Jyotiraditya M Scindia chuan, NE Bankers’ Conclave 3.0 chhunga session pali aṭangin rawtna 10 ṭheuh nei tur leh rawtnate tihpuitlinna tur kawng 40 duang chhuak turin kal khawmte a chah. Rawtnate tipuitling turin hunbi ruat tur leh tehfung fel tak duang tura chahin, NE Bankers’ Conclave 4.0-ah chuan hmasawnna nasa zawk neih ngei a nih a beisei thu a sawi.

NE Bankers’ Conclave 3.0-ah hian thupui chu ‘Fuelling the growth engine’ tih a ni a; chief minister Lalduhoma, Rural Development minister Prof. Lalnilawma, chief secretary Khilli Ram Meena bakah, DoNER, NEC, NEDFi, Department of Financial Services, hmarchhak state sorkar leh bank hrang hrang aiawhte an tel a ni.

DoNER MINISTER THUSAWI DANG

✓ Mizoram hi digital payment ṭha taka kalpuina state a ni a, PMJJBY leh PMSBY pawh ṭha takin kalpui a ni.

✓ Mizorama PM Jan Dhan Yojana leh PM Vishwakarma-a inziah luh kawngah nasa zawka ṭan lak a pawimawh.

✓ Bank hnathawk dan hi pûktir lam uar zawnga ṭan lak a ṭul.

✓ Bank la awm lohna khua chu bank emaw, business correspondent emaw, India Post Payments Bank emaw nena thlun zawm te, MSME leh women entrepreneur-te hnena loan pekte uar zawka kalpui a ṭul.

✓ Kut hnathawktute tana eizawnna ngêlnghet thlen thei tur hmalakna kalpui leh inthlun zawmna leh inkalpawhna ṭha siam a pawimawh.