Mizoram Travel Fest 2026 ṭan a ni

Tourism department chuan nimin khan Mizoram Travel Fest 2026 an buatsaih ṭan a, Tourism minister Lalnghinglova Hmar-in Aijal Club-ah a hawng. Minister chuan, khualzinte'n Mizoram mawina mai ni loin, a chhunga chêng mipui nunphung hlutna an hmuh tel a pawimawh thu a sawi.

Mizoram Travel Fest hi October 13-15, 2026 chhung hman tur a ni a; vawiin hian Assembly Annex conference hall-ah 'Investing Mizoram can: Culture, adventure and nature for sustainable development' tih thupui hmangin Mizoram Tourism Conclave buatsaih a ni dawn a, thupui ṭhen têt hrang hrang ngaihthlaka sawiho a ni ang. Naktukah Thenzawl Golf Course leh Champhaia Hnahsin Kût an tlawh dawn a ni.

Lalnghinglova Hmar chuan, tunlaiah social media a ṭangkai thu sawiin, "Heng hmangte hian kan ram mawina pho chhuak a, khualzin hîp kan tum tur a ni. Khualzinte'n Mizoram mawina mai ni loin, a chhunga cheng mipuite nunphung hlutnate an hmuh a pawimawh tel a, chumi tur chuan kan vaia kan ṭan rual a pawimawh," a ti.

Mizoramah hmuh theihin tourism a ṭhang tih sawiin Minister chuan, "Mizo hnam nunphung humhalh chunga khawtlang mipui inunauna hmanga khualzin hîp (community-based tourism) kan kalpui a ṭul a, hemi atan hian tourism lama mithiam te, tour operator-te leh mipui ṭanrualna a pawimawh," a ti a; Mizote nunphungah ṭanpui ngaite ṭanpui, mi dang ngaihsak, khualzin chunga ṭhat chhuah te a bet tlat avangin chu'ng hmang chuan tourism-ah hmasawn theih a nih thu a sawi.

Tourism Minister chuan, sorkar enkawl tourist lodge-te chu tihhmasawn zel an tum thu a sawi rualin, mimal enkawl homestay-te khualzinte tan a pawimawh thu a sawi a, "Homestay-te hian ṭhalaite leh hmeichhiate tan eizawnna kawng a hawng a, khualzinte dawnsawn leh faina kawngah homestay enkawltute'n ṭan kan la zel tur a ni," a ti.

Mizoram Travel Fest hawnnaah hian Tourism secretary Dr Lalrozama'n inlawmna thu a sawi a; Northeast India Chef Association & Ethnic Food Researcher vice president Atul Lahkar-a'n 'Promoting Mizo cuisine as a tourism experience' tih thupui a sawi a ni.

TOURISM MINISTER THUSAWI DANG

* Khualzin hîpna tur atana kût (festival) kan buatsaih ṭhinte hian a khaw mipui tan eizawnna a siam ṭhin.

* Thingtlangah chuan Mizo chaw dik tak leh nunphung dik tak hmuh tur a awm ṭhin avangin Aizawl páwnah tourism kalpui mek zel a ni.

* Association of Tour Operators Mizoram hi Mizoram leh a tlawhtu khualzinte inkara inkungkaihna siamtu an ni a, Mizoram hmun tlawh hlawh lote pawh tour operator-te'n kawhhmuh ṭhin a ṭha.

* Mizoram mite pawhin hmun mawi tak tak tlawh loh kan ngah a, heng hmunte hi tihlar kawngah ṭan kan lak zel a ṭul.

* Mizoramin ramngaw ṭha leh mawi a neih hi khualzinte tlawh châk chhan a nih avangin ṭhangtharte'n humhalh a ṭul.

* Ramngaw leh ramsa tichereu lo zawnga khualzinte hîp (eco-tourism) a pawimawh.

* Khualzin hîpnaah hman khat daih sarâng (single used plastic) titlem turin theihtawp kan chhuah.

* Zirbingna ti duh zirlaite tan Mizoram hi remchang leh ṭha tak a ni.