KHAWTHLIR

YMA-in thisen pe

Seling Branch YMA chuan nimin khan an khuaah thisen pek rûnpui an huaihawt a; Civil Hospital, Aizawl tan thisen unit 57 an pe a, petute mipa 41 leh hmeichhia 16 an ni.

BSF-in bungrua pe

Border Security Force (A Coy AOR) chuan nimin khan Mamit district-a South Phuldungsei community hall-ah Civic Action Programme an hmang a, zirlaite mamawh stationery bungrua, infiamna hmanrua, cement-a siam tui tihthianghlimna, plastic chair leh dawhkan te Phuldungsei khawtlang hnenah an hlan. Bungruate hi BSF 191 Bn commandant Ashutosh Kumar Chauhan-a'n khawtlang hruaitute hnenah a hlan a ni.

Meth man

Assam Rifles leh Bawngkawn Police Station chuan October 12, Thawhṭanni khan Ramhlun South-ah hmeichhe pahnih hnen aṭangin methamphetamine mûm 9,200 (gram 950) an man. Hmeichhe pakhat zawk hi Myanmar lam mi a ni.

Barak lui sawiho

Lunglei additional DC Zoramdini hoin nimin khan 'Conservation & Restoration of Catchment Areas of Barak River in the States of Assam, Manipur, Mizoram and Nagaland' project kaltlanga Barak lui fintu leh a pêngte humhalh leh siamṭhat dan tur sawiho a ni. Project kaltlang hian Barak lui chhehvelah ramngaw, nungchate leh tuihna humhalh bakah, kut hnathawktute eizawnna leh hmasawnna atan hmalak tum a ni.

PM-RAHAT sawiho

Khawzawl bawrhsap K Vanlalṭhiana kaihhruaiin nimin khan PM-RAHAT scheme chungchanga hmalak dan tur rêl a ni. PM-RAHAT scheme atana hman tur TMS 2.0 portal training neih a nih tawh thu leh district chhunga empanelled hospital-te chu scheme hmang tura an inpeih tawh thu an tarlang.

Mamit dist tlawh

Northeast Regional Computing Program hnuaia Feasibility Study Team chuan October 11, 2026 khan KfW Germany ṭanpuina hmanga project duan, 'Conservation and Restoration of Catchment Areas of Barak River' chungchangah Mamit district an tlawh. Mamit district-a khaw hrang hranga VC, pawl leh khawtlang mipui hnenah project chungchang an hrilhfiah a ni.

Thlai chi sem

KVK, Khawzawl chuan nimin khan Chawngtlai, Ngaizawl, Khawzawl leh Tuipui khuaa kut hnathawktu mi 80 hnenah thlasik thlai chi leh broccoli leh zikhlum ṭiak an sem. Thlai chi sem hi Khawzawl KVK senior scientist Dr Malsawmkimi'n a ho a; subject matter specialist (Horticulture) Vanlalnunhlui'n thlai chi sem tâkte chìn leh enkawl dan bakah, taksa tana an ṭhatnate a sawifiah.