Biometric Aadhaar Authentication Gas consumer-te'n an tih vek a ngai

Food, Civil Supplies & Consumer Affairs (FCSCA) department chuan thuchhuah siamin, eirawngbawlna gas (LPG) hmangtute chu Biometric Aadhaar Authentication (BAA) ti vek turin an ngen a; BAA chu OMC mobile application-ah mahnia tih theih a nih thu an tarlang.

FCSCA chuan, Ministry of Petroleum and Natural Gas-in a ruahman angin India rama domestic LPG consumer-te'n BAA an tih ngei a ngai tih an tarlang a, "Mizoramah pawh hun eng emaw chen aṭang khan oil company hotute leh agency-te'n hma an la tawh a, heti chunga BAA la ti lo chuan LPG rate pangngai (retail selling price with subsidy) angin October 1, 2026 aṭang chuan gas an la ve thei tawh dawn lo," an ti.

BAA ruahmannain a tum ber chu LPG subsidy rate-a a chang tur dik takte'n gas an chan ṭheuh theihna atan a nih thu tarlangin FCSCA chuan, "Chumi tihhlawhtlin nan chuan BAA hi gas LPG consumer zawng zawngte'n an tih ngei hi sorkar laipui chuan a phût. BAA hi Mizorama gas connection nei zawng zawngte ti ngei turin kan chah a ni," an ti a; BAA ti lote'n man to zawkin gas an lak a ngaih dawn thu an tarlang.