College SU-te'n inkhawmpui an hmang

Aizawl City College Joint Students’ Union (ACCJSU) chuan nimin khan Vanapa Hall-ah Assembly cum Election vawi 27-na an hmang a, minister of state B Lalchhanzova'n a hmanpui.

B Lalchhanzova chuan, zirlaite chu an tun hun hmang ṭha turin a chah a, "Hun lo awm tur thui tak ngaihtuaha lungkham loin, vawiin ni zel hi ṭha taka hman a pawimawh a, chu chuan hma lam hun ṭha zawk min neihtir dawn a ni," a ti.

B Lalchhanzova chuan, tum mumal tak neih a ṭhat thu sawiin, "Tum tak takna hian thawhrimna a keng tel ṭhin," a ti a; "Tum mumal nei lote pawhin kan taimak a, kan thawhrim tlat chuan Pathianin kan beisei aia ṭha leh kan ngaihtuah phak loh malsawmna hian min lo hmuak ṭhin a ni," a ti bawk.

Aizawla college student unionte intèlkhawmna, ACCJSU inkhawmpuiah hian All Mizoram Principal Council aiawhin Prof. JV Nunchunga'n thu a sawi bakah, pawl president Lalremtluanga'n thu a sawi a; assistant general secretary Lalṭhazuala'n ACCJSU nihna leh hmalakna tlangpui a sawi bawk.