Larsapin Subroto Cup-a 2-nate a lawmpui

Governor Gen. Dr Vijay Kumar Singh chuan nimin khan Lok Bhavan-ah 65th Subroto Cup 2026 Junior Gilrs (U-17)-a runners up Mizoram NCC U-17 Girls Football Team (Springfield Higher Secondary School, Aizawl) hnenah lawmpuina a hlan.

Larsap chuan, intihsiakna ngaihhlut hlawh leh hautak tak Subroto Cup 2026-ah Mizoram U-17 Girls NCC Team pahnihna an ni thei chu a lawmpui thu leh, an hlawhtlinna chu chhinchhiah tlak a tih thu a sawi a; an thlen chin chu hlawhtlinna sang zawk chang tura ṭan lak nan hmang tur leh, infiamna leh zirna kal kawptir thiam turin team member zirlaite a fuih.

Mizoram sorkar, NCC, zirna-in leh infiamna kaihhnawih pawl hrang hrangte chu thiamna bik nei naupangte zawng chhuak a, kaihhruaina leh hmanraw ṭha, a bik takin hmeichhe naupangte infiamnaah an hlawhtlin theih nan ṭan lakpui turin Gen. VK Singh chuan a chah a, "NCC hi nungchang siamṭhatna, theihna tihpunna leh ngaihtuahna dik tuhna tura duan a ni," a ti.

Governor chuan, NCC cadet-te chu mi dangte tana entawn tlak ni tur leh mahni inthununna ṭha tur te, mi dangte zah thiam tur te, khawtlang tana mi ṭangkai nih tum turtein a fuih bawk.

65th Subroto Cup 2026 Junior Gilrs (U-17)-a pahnihna NCC U-17 Girls Football Team coach/manager, Springfield Higher Secondary School vice principal leh NCC hotute hnenah Larsap hian lawmpuina hûnmawi (memento), thuchei leh thilpek dang a hlan a ni.