SSA zirtirtu chungchanga court rorel Sorkarin court sang zawkah a khing

Mizoram sorkar hnuaia SSA zirtirtute a ngheta lak chungchanga Gauhati High Court-in March 17, 2023-a thutlukna a siam chu Mizoram sorkar chuan court sang zawk Division Bench-ah a khing lêt.

Thu dawn danin, SSA zirtirtute chungchanga High Court thutlukna a khin let bakah hian Mizoram sorkar chuan, Court thutlukna khin let theih hun ni 1,198-a a pelh tawh avangin ngaihhnathiamna dilna an thehluh nghal. Sorkarin ngaihhnathiam a dilna hi Court-in a ngaihtuah phawt ang a, a thutlukna azirin Mizoram sorkarin Coutr thutlukna a khin letna thubuai chu ngaihtuah theih chauh a ni ang.

Gauhati High Court-in March 17, 2023-a thutlukna a siam hnuah, thutlukna anga hmalak a nih loh avangin Court zah lohna leh thu zawm lohna thubuai chu kum 2023 khan thehluh a lo ni tawh bawk a; hemi chungchangah hian High Court chuan sorkar officer ṭhenkhatte chu anmahni ngei court-a inlana insawifiah turin a lo ti tawh a ni.

Sorkar officer-te hian anmahni ngei court-a inlan tura tihna chu duh loin, thupek siamṭha tura ngenna Court-ah an thehlut ve bawk a; officer-te ngenna chu October 5, 2026 khan Court-in a ngaithla a, mimala inlan tura tihna chu sût a ni. Kum 2023-a court thutlukna khin letna chu thehluh a nih tawh thu leh kalpui mek zel a nih thu court chu hriattir a ni bawk.