AR-in leiṭha leh meizial man

Assam Rifles sipaite chuan nimin khan Khawlailung khuaa in pakhatah Myanmar aṭanga lak luh nia hriat ram dang meizial báwmpui (case) 226 an man a, a neitua puh mi pathum an man bawk.

Foreign cigarette an mante chu - Patron báwmpui 111 leh Oris báwmpui 115 a ni a; cheng nuai 542 hùa chhût a ni. Meizial leh a neitua puhte chu Serchhipa Legal Metrology department hnenah an hlân.

Ngopaa inkulh Assam Rifles sipaite pawhin October 12, Thawhṭanni khan Ngopa huam chhungah truck pakhat aṭangin dan loa tawlh rûk leiṭha (urea) ip 109 an man a, a neitua puh mi pahnih an man nghal. Leiṭha an man hi cheng nuai 98 hùa chhût a ni a, Saituala District Agriculture Officer hnenah an hlan a ni.