IFMIS tihchangtlunna tur hawn a ni

Finance department (Fiscal Management Wing) chuan October 12, Thawhṭanni tlai khan Finance secretary Ramchuana hoin Integra-ted Financial Management and Information System (IFMIS) tihchangtlunna module thar pahnih - Pension Module leh e-Voucher Module te an hawng a, Employee Module Version 2.0 (e-HRMS) an hawng bawk.

Ramchuana chuan, IFMIS module thar pahnih Mizoram sorkarin a kalpui chu hmasawnna ropui tak a nih thu a sawi a, "Khawvel changkang zelah financial management system a pawimawh chho zel. e-Voucher Module hian thla tina Accountant General office-a account thehluh hun a tih hma ka beisei a, compilation-ah nasa takin hmasawnna a thlen tawh dawn a ni," a ti.

Pension Module chungchang sawiin Finance Secretary chuan, "Manual-a pension paper process a nih tawh dawn loh avangin pension a hun taka pek chhuah kawngah mipui tan a ṭangkai a rinawm," a ti a; Employee Module chu tihchangtlung zel a nih chuan rah ṭha a chhuah ngei a beisei thu a sawi.