PE Minister-in Solar Power Plant a tlawh; Sumsuih Solar Plant-ah hna 50% zo tawh

Power & Electricity minister F Rodingliana chuan nimin khan Sumsuih rama Solar Power Plant siam mek a tlawh. Plant siam mekah hian kawlphetha megawatt 5 siam chhuak thei tur solar plate 8,640 dah a ni dawn a, hna 50% vel zawh a ni tawh.

F Rodingliana chuan, Sumsuih Solar Plant-ah a rang thei ang bera kawlphetha siam chhuah a nih theih nan chak taka thawk turin contractor-te a chah a, "Solar leh hydel project aṭanga kawlphetha tharte chu chhun leh zana inbànlet turin ruahmanna felfai tak siam a ni. Solar aṭanga kawlphetha siamte chhun lama mamawh atana hman tur a ni a, hydel project aṭanga kawlphetha siam chhuahte chu zan lama chhit turin sorkarin a ruahman a ni," a ti.

Nizung aṭanga kawlphetha siam tipung turin hmalak mek a nih thu sawiin Minister chuan, "Sumsuih Solar Plant (MW 5) siam mek bakah, Vankal (MW 20), Thenzawl (MW 10) leh Tlungvel (MW 2) te aṭangin kawlphetha thar chhuah mek a ni a, heng bakah hian hmun hrang hrangah sorkar leh private developer ten kawlphetha MW 120 dang an siam chhuahna tur ruahman mek a ni," a ti a; grid connected rooftop solar aṭangin MW 2.5 siam chhuah mek a nih thu leh rooftop solar tam zawk vuah tum a nih thu a sawi.

Power Minister chuan, zana kawlphetha mamawh phuhru turin MW 24 siam thei Turini Hydel Project siam mek a nih thu a sawi a, "Mizoram sorkar enkawl hydel project dang - Kau Tlabung (MW 3), Teirei (MW 3), Khawiva (MW 1.05) leh Kàwlbêm (MW 4) te hi tuikhuah niin, tui tam tak khawl thei tura duan a ni," a ti.

PE Minister hi PE secretary Dr H Lianzela, E-in-C Ngursailova Sailo, chief engineer Laltlanthanga, contractor Zoram Energy Development Agency (ZEDA) director Lalnunpuii leh engineer dangte bakah, Sumsuih khawtlang hruaitute'n an ṭawiawm a; hmalak tawh dan leh hmachhawpte an sawiho nghal a ni.

POWER MINISTER THUSAWI DANG

* Tuikhuaha tui tlingte hi zan lamah chhuahin, kawlphetha siam nan hman a ni dawn.

* Tuikhuahteah tui tam zawk a tlin theih nan a bang tisang turin buaipui mek a ni.

* Khawiva leh Kau Tlabung buaipui mek a ni a, zawh hunah tui cubic meter 2,73,601 an khawl thei dawn.

* Tuikhuah dangte pawh a tahtawla chhunzawm tur a ni a, Tuivai Hydel Project (MW 132) rei lo te chhunga lung phûm tum a ni.

* DPR ennawn mek Tlawng Hydel Project leh MW 50 siam thei tur Tuichang Pump Storage Project tihlawhtling turin hmalak mek a ni.