GAWSS III-ah Tlawng tui a pump theih loh: 'Theihtawp kan chhuah mek' - PHE Minister

Tun dinhmunah Greater Aizawl Water Supply Scheme (GAWSS) Phase III-ah Tlawng tui pump theih loh a ni mek. Public Health Engineering minister Prof. Lalnilawma chuan, Tlawng tui pump a nih theih nan theihtawp an chhuah mek thu a sawi.

PHE Minister hian nimin khan GAWSS Phase III a tlawh a, harsatna an tawh dan a enfiah. Minister hi PHE secretary Zodingpuii, Finance secretary Ramchuana, Disaster Management & Rehabilitation secretary Sushil Singh leh PHE department hotu dangte'n an ṭawiawm.

GAWSS III-ah hian Tlawng lui tui lakna (intake) chu August 27-28, 2026-a ruahsur nasa avangin chirhin a hnawh a, intake chhungah feet 400 vel tui a tlin avangin thenfai theih a ni rih lo. Tun hnaia khua a ṭhat deuh hnuah thenfai ṭan a ni.

Tlawng tui pump theih a nih rih loh avang hian GAWSS III-ah hian lei hîpna (gravity) hmanga Setlak lui tui lak a ni. Khua a ṭhâl deuh chuan Setlak lui tui lak tur a awm lo thuai dawn thung. Hei vang hian Tlawng lui tui pump a nih thuai theih nan theihtawp chhuah a ni.

GAWSS III-a harsatnate chu PHE Minister-in nimin khan a hmunah a tlawh a, official-te nen chak zawka hmalak dan tur an en. Ruahman dan chuan, intake chhunga chirh chunglam thenfai zawh hunah tui nena inchiah chin chu balu hîpna hmanga tihchhuah tum a ni a, October thla chhungin zawh hman beisei a ni.

Prof. Lalnilawma chuan, lei hipna hmanga Setlak lui tui lak chu a theih loh thuai dawn tih sawiin, "Lak tur a awm loh veleh Tlawng lui pump a nih theih nan hmalak a ngai a, theihtawp kan chhuah mek a ni," a ti.

PHE depatrment-in harsatna an tawh chu mipuiin hriatsak se a duh thu sawiin PHE Minister chuan, "Harsatna kan tâwk chung pawhin theihtawp kan chhuah zel," a ti a; leivûng luang thla lak pênna tur siam leh JCB hmanga leivûng then theih tura siam an tum thu a sawi.