CM-in ZMCH-ah lung zaina a hawng

Zoram Medical College & Hospital-a Cardio-thoracic & Vascular Surgery (CTVS) unit din thar chu nimin khan chief minister Lalduhoma'n a hawng.

CTVS unit hi Doctors for You leh SBI Mutual Funds Management ten SBI Mutual Funds Management Limited CSR sum an pek c heng vbc 3.7 sênga din a ni a; a hawnnaah hian bialtu MLA Baryl Vanneihsangi Tlau, SBI Funds Management hotu Dr Rajat Grover leh Doctors For You president Dr Rajat Jain te pawh an tel.

ZMCH-a Cardiothoracic & Vascular Surgery unit hawnna inkhawm hi ZMCH director Prof. Zoramthara Zadeng-in a kaihruai a, Doctors for You President-in project an kalpui dan a sawi. Dr Rajat Grover pawhin thu sawiin, Mizoram tan hmalak zel an châk thu an tarlang.

CM Lalduhoma chuan, Mizoramah super-speciality enkawlna a awm theih nan Health minister Lalrinpuii'n hma a la nasa tih a sawi a, "Sum leh paia min ṭanpui turin SBI Mutual Funds Management leh Doctors For You te nen an indawr a, anni'n phûr takin min lo thawhpui a, min ṭanpuitu leh fund min petute chungah kan lawm hle," a ti.

ZMCH tihhmasawn zel an tum tih sawiin CM chuan, "SASCI aṭangin Dialysis Unit kan dah belh dawn a, tuna pali chauh kan neih hi cheng vbc 5.6 sêngin a dang 21 dah belh kan tum," a ti a; complex chhunga inkalpawhna kawng pawh siam ṭhat a nih dawn thu a sawi.

Chief Minister chuan, ZMCH-ah auditorium te, cathlab facility, IVF centre level-2, neurosurgery unit, Radiodiagnosis & Imaging department leh procurement of high-end ultrasound machine te pawh nei turin hma an lak zel dawn thu a sawi bawk.

ZMCH-ah hian March 2026 aṭang khan thisen zam zai theih ṭan a ni a, August 19, 2026 khan lung zai (open-heart surgery) hlawhtling taka tih niin, Mizoram sorkar damdawi-ina lung zai hmasak ber a ni.