CM-in Goa leh Chandigarh ṭhalaite a kâwm

Chief minister Lalduhoma chuan nimin khan CMO conference hall-ah sorkar laipui hmalaknaa neih mek Yuva Sangham Youth Exchange Programme hmanga Goa aṭanga ṭhalai 50 rawn zin mekte leh, Ashtha Laksmi Darshan hnuaia Chandigarh aṭanga ṭhalai 20 rawn zin mekte a kâwm.

Chief Minister chuan, Mizorama an chàm chhungin a tam thei ang ber fang kual a, Mizoram nena inpawhna thûk tak, inhriat tawna tam tak neih tum turin ṭhalaite chu a chah a, "Ṭhalaite hi India ramin resource a neih hlu ber in ni a, kum 2047-a developed country nih kan tumna kawngah pawh mawhphurhna pawimawh tak chelhtute in ni," a ti.

India ramah hnam hrang hrang an cheng tih sawiin Lalduhoma chuan, "Kan inkara inunauna ṭha neih hi ram hmasawnna tura kan hmalakna tinrengah a pawimawh avangin hetiang programme kan buatsaih thinte hi a ṭangkai hle a ni," a ti a; Mizoramah hlim taka hun hmang turin duhsakna a hlan.

Ṭhalaite hian CM chu thil chi hrang hrang an zâwt a; hnam hrang hrangte inkara inunauna ṭha a awm theihna tura a ngaihdan te, Mizoram economy hmasawnna atana a hmathlir Transform Mizoram Vision 2047 chungchang te, Mizo hnam nunphung leh chin dante an sawipui a ni.