Insurance pawimawhna inzirtir a ṭul - Dr Vanlalthlana

Mizoram University-a Centre for Disaster Management leh Oil India chuan nimin khan BSI Hall, Aizawlah 'Fire and Financial Management for Disaster Resilience' tih thupui zirhona hun an buatsaih a; an hun hmanpuitu minister Dr Vanlalthlana chuan, insurance pawimawhna inzirtir a ṭul thu a sawi.

Dr Vanlalthlana chuan, chhiatrupna a thlen hnua ṭanpuina sum inpek ringawt aiin, chhiatna a thlen hmaa inbuatsaih a pawimawh zawk thu a sawi a, "Sorkar sum ringawt a tâwk loh avangin mipuiah insurance pawimawhna inzirtir a ṭul. Kângmei emaw, leimin emaw vanga chhungkua an tlakchhiat loh nan mipuite insurance lam zirtir a pawimawh," a ti.

Zirlai leh mithiam kal khawmte chu an thiamnate sorkar leh mipui tana ṭangkai taka hmang tura chahin Minister chuan, "Mizoramin thingtlang leh khawpuiah kângmei chhuak kaihhnawihah chona lian tak a hmachhawn mek. Thingtlangah lo hâl aṭanga ram kâng ṭhin laka himna turin kan chìn dan leh thiamna thar hman kawp a ngai," a ti a; khawpuiah pawh in sak dan khauh leh him zawk hman a ṭul thu a sawi.

Ni hnih awh zirhona hi 'International Day for Disaster Risk Reduction' (October 13) puala buatsaih a ni a; kângmei laka inven dan bakah, leilung hausakna (natural gas) hman dan leh sum enkawl dante zirho a ni.