Exhibition cum Booksale buatsaih

Art & Culture department hnuaia pêng pali - Tribal Research Institute, Mizoram State Archives, Mizoram State Museum leh Mizoram Publication Board te chuan nimin khan Kolasib Venglaia Taitesena Hall-ah 'Museum, Record Exhibition cum Booksale' an buatsaih a; Kolasib bawrhsap H Dolianbuaia'n a hawng.

Museum, Record Exhibition cum Booksale-ah hian State Museum-in State Museum-a Mizo thil (object) chi hrang 135 bakah, ram dang pawisate leh lunghlute an pho chhuak a; Tribal Research Institute-in Mizo hnam nunphung zirchianna bu leh lehkhabu hlui, chhut nawnte mipui lei theihin an chhawp.

Mizoram State Archive-in lehkhabu váng tawh bu 45 leh document pawimawh tihlen (enlarge) 30 te, Pu Buanga Log Book, Mizo chanchinbu 'Laisuih' leh chanchinbu chhuak hmasa ṭhenkhat an tár chhuak a; Mizoram Publication Board-in lehkhabu chi 70 chu man tlawm zawkin an zuar bawk.

Exhibition cum Booksale hawnna inkhawm hi Mizoram State Museum curator C Lalruatfela'n a kaihruai a; H Dolianbuaia chuan, Exhibition chu zirlaite'n tan a hlut thu a sawi a, "Hmanlai Mizo incheinate leh an ina awm ṭhin bungruate chu a tak ngeia an hmuh avangin an ngaihtuah thiam tawh dawn a ni," a ti.

Museum, Record Exhibition cum Booksale hi kum tin district inchhâwkin buatsaih a ni ṭhin a; vawiin hian chhunzawma zawh a ni ang.