Upate tan a thlâwna inentirna buatsaih

National Programme for Health Care of the Elderly (NPHCE) leh NPNCD chuan October 13, Thawhlehni khan State Senior Citizens Home, Ainawn Vengah International Day of Older Persons (October 1) pualin hun an hmang a; upate pualin a thlâwna inentirna buatsaih a ni.

A thlawna inentirnaah hian State Senior Citizens Home-a awm mekte bakah, MUP member eng emaw zatte hriselna dinhmun enfiah a ni a, mi 84 en an ni. An mamawh ang damdawi chi hrang hrang a thlâwnin an pe nghal. Upate chu hriselna ṭha nei tura an inenkawl dan tur te, ei tur ṭha leh ṭha lo te, nunphung ṭha zawk an neih dan turte zirtir an ni bawk.

State Senior Citizens Home hi Social Welfare department hmalaknain March 1, 1989 khan din a ni a, kum 60 chin chung lam mi 10 enkawl mek an ni. Thawktu pakua an awm a, a din tirh aṭangin tun thlengin mi 84 enkawl an ni tawh. Mizoram sorkarin mi 25 awm theihna tur tihlen a tum mek a ni.