Central-ah zawm neih tumna kan nei rih lo - Lalduhoma

ZPM party president Lalduhoma, chief minister ni bawk chuan, tun dinhmunah chuan ZPM party-in central-ah zawm neih tumna an la neih rih loh thu a sawi.

National media-te zawhna chhangin ZPM President chuan, kum 2028 MLA inthlan awm tur chu an party-in party mala an chuh ngei a rinawm thu a sawi a, "Mahse, politics hi chu khawvela thil sawi lâwk theih loh ber a ni. A hun laia thil thleng a zir zelin thutlukna a hun takah siam a ni ang," a ti.

ZPM President chuan, BJP kaihhruai National Democratic Alliance (NDA) emaw, Congress party kaihhruai Indian National Developmental Inclusive Alliance (INDIA) zawm tumna an neih loh thu sawiin, "Sorkar laipui ṭha taka thawhpui kan duh a, anni pawhin ṭha taka min thawhpui kan beisei," a ti a; sorkar laipui nen thawhhona ṭha tak an neih mek thu a sawi.

Lalduhoma sawi danin, tun dinhmunah chuan ZPM party chu regional party, ram pum huap thlirna nei, mahni kea ding a ni. Hun tawn a zirin central-a zawm neih leh neih loh chu an party thuneitu sangin an ngaihtuah dawn a ni.