KHAWTHLIR

Thisen pe

Nimin khan Mizoram University NSS chuan an hmunah thisen pek huaihawtin, Civil Hospital, Aizawl tan thisen unit 103 an pe a, petute mipa 80 leh hmeichhia 23 an ni. KṬP, Jubili Branch, Mission Vengthlang pawhin Synod Hospital tan thisen unit 31 an pe a, petute mipa 26 leh hmeichhia panga an ni.

Ambulance hlan

Chief minister Lalduhoma chuan nimin khan Health & Family Welfare department hotute hnenah Civil Hospital, Lungleia hman tur ambulance a hlan. Ambulance hi Chief Ministers Charitable Trust hmalaknain Rays Power Infra corporate social responsibility hmanga lei a ni.

Kuhva rah man

Nimin zing khan Khawzawl Police-te chuan Tuisenphaiah Ashok Leyland truck, AS 11 GC - 2884) aṭangin kuhva rah ip 170, Rs 3,40,000 hu an man. Kuhva hi truck khalhtu Lalrosanga (24) s/o Lalchhuanmawia, Zokhawthar leh G Thanglianmawia (20) s/o Lalnangliana of Kanan Veng, Champhaite ta a ni.

MLA-in kawng tlawh

Aizawl South-III bialtu MLA Baryl Vanneihsangi Tlau chuan nimin khan a biala Samlukhai khaw chhunga kawng siam mek a tlawh a, PWD hotute'n an ṭawiawm. MLA chuan, Samlukhai khaw chhung kawng, hun rei tak siam loha awm tawh, sorkar tharah siam a ni ta chu a lawmpui thu a sawi a, "Theihtawp chhuaha kan ṭanho zel chuan kan bial mamawhte kan la tipuitling zel dawn a ni," a ti.

Pastor Nupui Intawhkhawm

Presbyterian Kohhrana pastor nupuite chuan nimin khan Synod Conference Centre-ah Pastor Nupui Intawhkhawm vawi 47-na an hmang. Chawhmaah Rev. Dr R Vanlaltluanga, ATC-in rawngbawlna hlen chungchang a sawi a, chawhnuah Lalremruati Tlau-in 'Sum leh pai enkawl kawngah' tih leh 'Social media hman dan' tih thupui a sawi a; an member thi pahnih sunna hun hman a ni bawk.

POSH Act zirho

Hnathawhna hmuna hmeichhiate venhimna dan, Sexual Harrasment of Women at Workplace (Prevention, Prohibition and Redressal) Act, 2013 (POSH Act) chungchang zirhona nimin khan Taxation Auditorium-ah buatsaih a ni a, GAD secretary Sudhir Kumar-a'n a hmanpui. Zirhonaah hian Mizoram sorkar pisa hrang hranga POSH Act, 2013 master trainer-te an tel a, vawiinah chhunzawm a ni ang.

EFCI rorel

Evangelical Free Church of India (EFCI) rorelna sang ber dawttu Executive Council vawi 115-na chu October 14-15, 2026 chhung khan Saipum EFCI biak-inah neih a ni a, palai 72 an tel. Rorel hi moderator Rev. Jonathan Pudaite-in a kaihhruai a, kum 2027 budget atan Rs 12,81,17,357 an pawm a ni.

Lehkhabu tlangzarh

Zoram Thar hruaitu Rev. Dr Zaichhawna Hlawndo lehkhabu, 'The True Identity of Zofate' tih chu nimin khan Mizoram University-a Mizo department HoD Dr Zoramdinthara'n Zoram Thar Zawlbukah a tlangzarh.

Lirthei dan zirtir

Aizawl Traffic Police leh J Thankima College NSS chuan October 14, Nilaini khan J Thankima College-ah 'Traffic Rules & Driving Etiquette' tih thupui hmangin awareness campaign an buatsaih. Campaign-ah hian JTC-a zirlai lirthei keng ṭhinte bakah, first semester zirlai 250 an tel a; Traffic Police serista Lalawmpuia leh sub-inpector Saptea Darchhun ten lirthei dan leh traffic rules-te an zirtir a ni.