Mitdelte dimdawi turin mipui ngen

Nimin kha mitdelte tiangvár hman ṭan ni, 'White Cane Day' a ni a; he ni pual hian Mizoram Blind Society (MBS) chuan thuchah tichhuakin, Zoram mipui, a bikin lirthei khalhtute chu mitdel tiang hawla khawlaia kalte dimdawi a, an tiang hawlte zahsak turin an ngen. Day thupui chu ‘A lack of sight is not a lack of vision' tih a ni.

MBS chuan, Mizoramah kum 2016 aṭangin White Cane Day hman ṭhin a nih thu an tarlang a, "White Cane Day-in a tum ber chu mitdel leh khaw hmu fiah lote'n an puala tiang siam hawla khawlaia an lenvahnaah mipui vantlangin an hriatthiam a, a ṭul anga an ṭanpui theih nan leh lirthei khalhtute pawhin an tiang hawl an zahsaka an fimkhur theih nana inzirtirna ni-ah hman ṭhin a ni," an ti.

Mitdelte'n khawvel hran an nei lo tih sawiin MBS chuan, "White Cane Day pual hian Zoram mipui, a bikin lirthei khalhtute chu mitdel tiang hawla khawlaia kalte dimdawi thiam a, an tiang hawlte zahsak turin kan ngen thar leh a ni," an ti a; zalen leh thlamuang taka khawlaia mitdelte an veivah theih nan hmangaihna leh hriatthiamna nena ṭanpui ṭhin turin mi tin an ngen.

MBS tarlan danin, thlalaka eizawng James Biggs chu kum 1921 khan chetsualna vangin a mit a del a, a mit a del hnuah khawlaia a chhuah chángin tiang vâr a hawl ṭhin. A tiang hawl, rawng var a hnawih chhan chu, lirthei khalhtute leh kawtthlera veivakte'n amah chu khaw hmu lo, mitdel hriatthiam ngai a ni tih awlsam taka hriat theih nan a ni.

James Biggs tiang hnawih var chu a ṭangkai avangin khawvel hmun dangah pawh an hmang ve ta zel a, USA-a The National Federation of the Blind-in White Cane Day hman an rawt hnuah, kum 1964 khan October 15 chu White Cane Day-ah puan a ni.