Lawngtlai AOC YLA-in lirthei 10 an man Dealer intiamkamna nen thawn lêt an rêl
Lawngtlai bawrhsap Donny Lalruatsanga hoin nimin khan a pisaah Central YLA hruaitute leh sorkar hotute'n YLA, Lawngtlai AOC Veng Branch-in Tata Yodha 10 an man chungchang an sawiho a; lirtheite chu dealer-te'n intiamkamna an nei a nih chuan thawn lêt an rêl.
Ṭhutkhawmah hian, October 13, 2026 zing dar 2-3 inkara YLA, AOC Branch-in Aizawl aṭanga kal Tata Yodha 10 an man chu District Transport Office (Enforcement) kutah an hlan tih tarlan a ni. District Magistrate thuchhuah palzûta dan loa kal a nih avangin, Tata Yodha dealer-te'n intiamkamna an nei thei a nih chuan lirtheite chu Aizawla thawn lêt ni se, an ti.
Myanmar ramri kaltlanga sumdawn chungchangah District Magistrate thupek chhuah tawh chu ṭha taka kenkawh ni se, hemi atan hian kawng engkimah thawhho ni se, an ti bawk.
CYLA hruaitute chuan, dan loa sum leh pai khawn chungchangah an theih ang anga hma an lak mek thu te, dan leh thupek kenkawh kawngah DC hmalakna an thlàwp tlat thute an sawi.
Lawngtlai AOC Branch YLA tarlan danin, October 13, 2026 zing khan Zothan Auto Works aṭanga kal Tata Yodha pick-up 10 an man. CYLA Kumpuan Chairman chuan lirtheite chu chawlhkar liam taa an intihfel tawh a nih avangin YLA AOC Branch duty-te a hrilh a, mahse, duty-te chuan an Branch OB-te thu hmu lo chuan an chhuahtir theih loh thu leh, khawvar hunah sorkar hnena hlan tura an rel thu an lo hrilh. Duty-te hian lirtheite chu October 14 khan sorkara thuneitute hnenah an hlan a ni.
CYLA chuan October 14, 2026 khan Emergency Meeting an ko a, October 14 vek khan YLA, AOC Veng Branch hruaitute chu an ṭhiat (dissolve) a, office bearer lailawk (adhoc) tur an ruat nghal a ni.
YLA, AOC Veng Branch chuan October 14 khan thuchhuah siamin, an branch hruaitute CYLA-in a ṭhiat chu inzahlohna leh intihmualphona nasa tak nia an hriat thu an sawi a, "Thil awmzia inzawt miah loa kan hotute'n hetianga notification min chhuah khum hi mak kan tiin ná kan ti hle... Branch dang chungah thleng ve lo se tih hi kan duhthusam a ni," an ti.