DDK Director thi ta chhungte'n IPR Minister Chhanzova an hmu

October 1, 2026-a Sateek daia Bolero chesuala thi DDK Aizawl director (News) Nampibou Marinmai, IIS chhungte chuan nimin khan IPR minister B Lalchhanzova a pisaah an hmu a; an pa te chetsualna leh thihna chungchanga Mizoram sorkar, YMA, media-a thawkte leh mipui chet danah an lawm thu an hrilh.

Nampibou Marinmai chhungte hian Minister hnenah thilpek an hlan a, Minister pawhin Nampibou-a nupui leh a fate pahnih chu thilpek a hlan ve bawk. B Lalchhanzova chuan, Nampibou chu a ṭhian ṭha, mi taima leh a hnaa inpe tak a nih thu sawiin, "A thihna hian min ṭhawng hle. Mi ṭha a nih avangin ka ui tak zet a ni," a ti.

B Lalchhanzova chuan, Nampibou chu Mizoram tan, a bikin media kaihhnawih lama hmasawn a tura ngaihtuahna nasa tak sênga theihtawp chhuahtu a nih thu a sawi a; a nupui leh a fate chu Mizoram aṭanga mamawh an neih apianga pui tura a inpeih reng dawn thu a hrilh a ni.

IPR Minister hmuhnaah hian Nampibou Marinmai chhungte hi PIB Aizawl head of office Dr Rajeev Lourembam leh MJA hruaitu ṭhenkhatte'n an ṭawiawm.

Nampibou Marinmai chhungte hian an pa ruang buaipuitu Sateek Branch YMA leh Tuikhuahtlang Branch YMA hnenah October 15, Ningani khan tea-urn an hlan a ni.