HTE department hmalakna thlirho

Nimin khan Secretariat Conference Hall-ah Higher & Technical Education (HTE) minister Dr Vanlalthlana hoin HTE department hmalakna leh hnathawh te thlirho a ni.

HTE Minister chuan, department hmalakna leh harsatna tawh mekte sawiho a ni ṭhin chu department-a thawkten an ṭhatpui tih a sawi a, "Department hnuaia office leh college hrang hrangte'n harsatna an tawh sawi tlan a nih hian department hawi zawng tur leh hmalak zel dan tur chiang takin a lang ṭhin," a ti.

HTE secretariat, directorate, subordinate office leh college hrang hranga thawkte fakin Dr Vanlalthlana chuan, "Tun hnaia department hnuaia hmalakna hlawhtling tak takte hi in thawhrim rah a ni," a ti a; zirlaite'n zirtirtute assessment an tihna tur profoma buaipui mek a nih thu a sawi.

Ṭhutkhawm hi HTE secretary Dr Lalrozama'n a kaihruai a; HTE department hnuaia office leh college hrang hrang aṭangin an hmalakna kal mek leh hmachhawpte ngaihthlaka sawiho a ni.

Tarlan danin, kum 2026 chhungin thawktu mi 70-in promotion an hmu tawh. Pre-matric scholarship dil kum 2025-26 ah mi 8,875 leh kum 2026-27 ah mi 10,238 an awm a; post-matric scholarship dil kum 2025-26 ah mi 32,375 leh kum 2026-27 ah mi 36,496 an awm bawk.