Minister-in MRB branch thar a hawng: Loan hmanga mi harsate châwi kânah Sorkar thlawp ṭha lehzual turin a ngen

Home minister K Sapdanga chuan, October 17, Inrinni khan a bial chhungah Mizoram Rural Bank, Chanmari West Branch a hawng a; loan hmanga mi harsate châwi kân kawngah sorkar thláwp ṭha lehzual turin MRB hotute a ngen.

K Sapdanga chuan, credit deposit ratio (CD ratio) chungchang sawi a nih fo thu sawiin, "State zingah a hnufûm ber pawl kan ni tih pawh kan hre tlang. Kum 2025-26 chhunga kan state-a bank awmte CD ratio chawhrual 55.83% a ni a, MRB CD ratio chu 63.29% a ni tih chanchin thar lamah kan lo hmu ṭhin a, a lawmawm," a ti.

CD ratio-ah MRB chu Mizoramah hmahruaitu an nih ngei a rin thu sawiin Minister chuan, "Hma in la sawn leh thei tih ka ring tlat. A bikin mi harsa zawkte loan hmanga chawi kân kawngah sorkar thláwp ṭha zual turin ka ngen che u a ni," a ti a; sorkarin Bana Kaih policy a kalpui pawh bank-te thawhpuina ṭha tel lo chuan an hlawhtlin zawh dawn loh thu a sawi.

K Sapdanga chuan, Bana Kaih chhunga beneficiary engzatin nge MRB branch hawn thar chu chhawr ṭangkai tih chu sorkar lam aṭanga tehna a ni lo thei dawn lo tih a sawi a, "MRB branch 107-na ka bial chhung Chanmari West-ah hawn a ni hi ka lawm hle," a ti a; mi rethei leh harsa zawk tan malsawmna nih tumin ṭang lehzual turin a chah.

Home Minister chuan, bank chu pawisa chuang liam, saving-a dahna mai ni loin, mahni kutkea leirem rap zo lote'n leirem an rah theihna tura bul ṭanna tur sum an pûk theihna a nih thu sawiin, "Mi hausate'n an ṭangkaipui tluk zetin harsa zawkte pawhin an ṭangkai pui thei," a ti a; MRB chu mirethei leh daikil kár zawka a awm te, thingtlanga awmte tana banking service hnuh hnaihna kawngah an thawh hlâwk thu a sawi.

MRB, Chanmari West Branch hawnna inkhawmah hian Aizawl mayor H Lalremtluanga, bialtu corporator ni bawk leh MRB chairman Sheryl L Vanchhawng pawhin thu an sawi a ni.

MRB Chairman sawi danin, MRB hi India rama regional rural bank (RRB) 28 zingah a tha ber pawl niin, hmarchhak state bikah phei chuan a ṭha ber dawttu a ni. Quarter liam ta July-September 2026 chhung khan loan cheng vbc 4,305.93 pe chhuakin, Mizorama bank zingah loan pe chhuak tam ber an ni a; Bana Kaih scheme hnuaiah mi 337 hnenah loan cheng vbc 25.34 an pe chhuak tawh bawk. Thawktu nghet mi 530 an awm a, regional office pahnih leh branch 107 an nei a ni.

October 17, Inrinni vêk khan Mizoram Rural Bank Staff Association chuan Art & Culture Auditorium, Beraw Tlangah Biennial General Conference vawi 18-na an hmang a, kum 2026-2028 chhunga an hruaitu turte an thlang a ni.