Mimal damdawi-inte'n MUHCS zawm turin Mizoram sorkar an ngaichâng

Non Government Hospital Association of Mizoram (NGHAM) chuan, Mizorama mimal damdawi-in, Mizoram Universal Healthcare Scheme (MUHCS) la zawm lote'n an zawm vek theih nan sorkar nen an inbiakrem thuai an beisei thu leh sorkar an ngaihchàn thu an tarlang.

Mimal damdawi-inte intêl khawmna NGHAM hian October 17, 2026 khan thuchhuah an siam a; "MUHCS hi NGHAM member hospital ṭhenkhat chauhin kan zawm chuan a zawm ve lo hospital-te tan tlakchhiatna a thlen theih dawn avangin pheikhai rual taka kal a ṭhain kan hria a, kan zavaia kan zawm theihna tura inbiakrem thuai kan beiseiin kan lo thlir reng a ni," an ti.

Mizoramah MUHCS la zawm lo mimal damdawi-in pakua an la awm tih sawiin NGHAM chuan, "Heng hospital-te hian MUHCS zawm turin sorkar kan biain kan hriattir tawh a, thil ṭul leh pawimawh thehluh ngaite thehlutin, sorkar lam hi kan ngaichang reng tawh a ni," a ti a; cashless-a inenkawl theih hma pawhin mipui harsatna zualpui phuhrûk nan medical re-imbursement phalsak turin sorkar an ngen.

Damdawi-in dinhmun (grade) chungchangah NGHAM chuan, "Hospital hrang hrangte hi kan dinhmun leh grade a inan loh avangin rate pawh a inang vek thei lo tih kan hria a, kan hospital grading min pek ang zela awm chungin tuna kan dinhmun sa aia kan chhiat lohna tur tal rate min pe turin kan beisei," an ti a; John Williams Hospital, Lunglei pawhin Synod Hospital, Durtlang rate an hman thu an tarlang.

NGHAM chuan, private hospital dintute chu entreprenuer an nih thu sawiin, "Risk sang tak lain, medical lamah kan ramin hma a sawn ve nan kan theih ang zela hma la ṭhintute kan ni a, Mizorama entrepreneur zingah chuan ṭhalaite tan hna siam tam berte zinga mi kan niin kan hria," an ti a; sorkar chu entreprenuer-te hma ngaitu a nih avangin private hospital-te tana ṭha turin a ngaihtuah an beisei tlat thu an sawi bawk.